Праваабаронцы прызналі палітвязнямі яшчэ 20 чалавек
23 ліпеня, Позірк. Прадстаўнікі беларускай праваабарончай супольнасці прызналі палітвязнямі яшчэ 20 чалавек, паведамляе цэнтр “Вясна”. Цяпер такі статус у Беларусі мае 1.157 чалавек.
Гэта змешчаныя пад варту і прыгавораныя да пазбаўлення волі Віталь Азрыменка, Максім Арціменя, Андрэй Бераставы, Яўген Бодрыкаў, Марыя Дзейчык, Дзіяна Гаўрылава, Аляксандр Герасіменка, Алег Зелянко, Андрэй Загорскі, Віталь Касцецкі, Васіль Клімовіч, Валянцін Клебановіч, Кірыл Краўцоў, Ірына Левіна, Юрый Несцераў, Сяргей Салажэнцаў, Вольга Сітнік, Віталь Чавусаў, Аляксандр Яцукевіч, Дзмітрый Ялчэнка.
Усе яны трапілі пад рэпрэсіі ў выніку супрацы з ініцыятывамі, прызнанымі “экстрэмісцкімі фарміраваннямі”.
Праваабаронцы канстатавалі, што МУС і КДБ “у пазасудовым парадку адвольна прызнаюць экстрэмісцкімі групы грамадзян, аб’яднаных грамадскімі або палітычнымі інтарэсамі, якія крытыкуюць дзеянні ўладаў і патрабуюць зменаў у дзяржаве і палітыцы, што праводзіцца ёю”.
“Шэраг СМІ таксама прызнаны экстрэмісцкімі фарміраваннямі. Гэта, у сваю чаргу, адкрывае шлях да адвольнага прыцягнення да крымінальнай адказнасці і пазбаўлення волі іх удзельнікаў і рэспандэнтаў як непрапарцыйнай меры абмежавання права на асацыяцыю і свабоды выказвання меркаванняў”, — гаворыцца ў заяве.
Напрыклад, 27-гадовага жыхара Оршы (Віцебская вобласць) Яўгена Бодрыкава ў чэрвені змясцілі ў следчы ізалятар у Віцебску ў рамках крымінальнай справы. Меркавана, яму ставіцца ў віну тое, што ён нібыта фатаграфаваў перамяшчэнне вайсковай тэхнікі, а пасля перадаў інфармацыю “забароненым рэсурсам”. Пасля прэзідэнцкіх выбараў 2020 года мужчына некалькі разоў падпадаў пад палітычны пераслед паводле адміністрацыйных абвінавачанняў.
У Гродзенскім абласным судзе ў сярэдзіне чэрвеня адбыўся працэс над ІТ-спецыялістам Сяргеем Салажэнцавым, які вярнуўся на радзіму. Калі яго затрымалі і судзілі, невядома. У 2021 годзе ён пераехаў у Варшаву і, напэўна, быў затрыманы пасля вяртання ў Беларусь напрыканцы 2024 года. Яму было выстаўленае абвінавачанне ў “фінансаванні экстрэмісцкай дзейнасці” (арт. 3612 КК).
Праваабаронцы патрабуюць неадкладна вызваліць усіх палітычных вязняў і спыніць палітычныя рэпрэсіі супраць грамадзян краіны.
Апрача “Вясны” заяву падпісалі Беларускі ПЭН, “Прававая ініцыятыва”, Lawtrend, Respect-Protect-Fulfill, Human Constanta.
