У Гродзенскім раёне знішчана 145 кг канопляў
23 ліпеня, Позірк. Дзікарослыя каноплі на плошчы 0,3 гектара (крыху менш за палову футбольнага поля) выявілі 22 ліпеня ў Гродзенскім раёне пагранічнікі і супрацоўнікі органаў унутраных спраў, вынікае з паведамлення Дзяржаўнага пагранічнага камітэта.
Каноплі агульнай вагой 145 кг спалілі.
Паводле інфармацыі Міністэрства ўнутраных спраў, з 1 чэрвеня па 15 верасня ў краіне праводзіцца спецыяльная праграма “Мак”, мэта якой заключаецца ў тым, каб прадухіліць доступ да дзікарослых раслін з утрыманнем наркатычных рэчываў, выявіць і знішчыць незаконныя пасевы.
МУС адзначае, што “пры выяўленні нават выпадкова праросшых макавых пабегаў або кустоў канопляў неабходна неадкладна іх знішчаць”.
У выпадку выяўлення незаконных насаджэнняў уладальніку ўчастка пагражае штраф да 20 базавых велічынь (да 840 рублёў), а вырошчванне такіх раслін з мэтай збыту караецца пазбаўленнем волі на тэрмін да 15 гадоў.
