ДМК справаздачыўся аб ліквідацыі схемы нелегальнай пастаўкі тавараў з Польшчы, распачатая крымінальная справа

22 ліпеня, Позірк. Супрацоўнікамі Дзяржаўнага мытнага камітэта (ДМК) спыненая нелегальная пастаўка тавараў з Польшчы, паведамляе прэс-служба ведамства.

“Бізнес” па транспарціроўцы тавараў праз мяжу арганізаваў грамадзянін Беларусі, які пражывае ў Польшчы, адзначае ДМК.

“38-гадовы мужчына прымаў заказы на куплю і наступную дастаўку ў Беларусь адзення, абутку, дзіцячых цацак, прадметаў бытавой тэхнікі, аўтамабільных запчастак”, — гаворыцца ў паведамленні.

Атрымаўшы заказ, мужчына “набываў тавары, а для далейшай дастаўкі заказчыкам з Беларусі перад перасячэннем мяжы раздаваў фізічным асобам паводле ўстаноўленых лімітаў на бязмытны ўвоз”.

Паводле ацэнкі ДМК, шкода дзяржбюджэту Беларусі склала звыш 650 тыс. рублёў.

“За ўхіленне ад выплаты мытных плацяжоў у буйным памеры грамадзянін будзе прыцягнуты да адказнасці паводле ч. 1 арт. 231 КК”, — адзначаецца ў рэлізе.

19 ліпеня паведамлялася, што ДМК раскрыў схему пастаўкі ў Беларусь тэхнікі без выплаты пошлін.

Адзначалася, што супрацоўнікі Аператыўнай і Брэсцкай мытняў выявілі групу асоб, якая для ўхілення ад выплаты мытных плацяжоў арганізавала “перамяшчэнне пад выглядам тавараў для асабістага карыстання некалькіх тысяч адзінак рознай бытавой і электроннай тэхнікі”.

“У выніку правядзення комплексу аператыўна-вышуковых мерапрыемстваў высветленая незаконная схема, якую прымянілі зламыснікі — на польскім баку тавары раздавалі асобнымі адзінкамі фізічным асобам, якія і ўвозілі іх бяспошлінна нібыта для асабістых патрэбаў, — гаварылася ў паведамленні. — На тэрыторыі Беларусі тавары забіралі арганізатары схемы, каб у далейшым рэалізоўваць праз інтэрнэт-крамы”.

Паводле інфармацыі ведамства, на тэрыторыі Мінска і Мінскага раёна мытнікі выявілі склады, дзе акумулявалася ўвезеная такім чынам тэхніка. У іх знайшлі каля 3 тыс. непрададзеных тавараў, у прыватнасці “духавыя шафы, варачныя панэлі, посудамыйныя машыны, кавамашыны, аэрагрылі, пыласосы, акустычныя калонкі, мыйкі высокага ціску, электрасамакаты, электраінструменты” ды інш. Агульны кошт выяўленых тавараў — звыш 2 млн рублёў (больш за 680 тыс. долараў паводле актуальнага курсу Нацбанка).

“Уся тэхніка канфіскаваная, праводзяцца далейшыя праверачныя мерапрыемствы па вызначэнні іншых датычных асоб”, — заявіў мытны камітэт.