У Брэсцкай вобласці ад пачатку года суды абавязалі 62 выпускнікі пакрыць выдаткі на навучанне праз адмову ад размеркавання

21 ліпеня, Позірк. Ад пачатку 2025 года суды задаволілі 62 іскі органаў пракуратуры Брэсцкай вобласці аб кампенсацыі выдаткаў на навучанне ў дачыненні да выпускнікоў, якія адмовіліся ад працы на падставе размеркавання, вынікае з інфармацыі прэс-службы Генеральнай пракуратуры.

Агульная сума іскаў склала больш за 650 тыс. рублёў.

У прыватнасці, жыхар Іванаўскага раёна пасля 3 гадоў навучання ў Пінскім дзяржаўным каледжы будаўнікоў быў размеркаваны ў аграпрадпрыемстве Пінскага раёна. На працу малады чалавек не прыбыў. Выдаткі за час яго навучання перавысілі 14 тыс. рублёў — менавіта гэтую суму суд пастанавіў вярнуць дзяржаве.

З той жа прычыны суд пастанавіў спагнаць з іншага выпускніка — жыхара Івацэвічаў — 14,5 тыс. рублёў.

Пракуратура адзначае, што судовыя рашэнні па такіх пытаннях, якія набылі моц, рэдка выконваюцца добраахвотна, таму ініцыяванае прымусовае выкананне.

Згодна з арт. 78 Кодэкса аб адукацыі, спецыяліст (рабочы, службоўца), які не прапрацаваў належны тэрмін на падставе размеркавання, абавязаны кампенсаваць у рэспубліканскі і (або) мясцовы бюджэт сродкі, выдаткаваныя дзяржавай на яго падрыхтоўку.

Добраахвотна кампенсаваць выдаткі можна на працягу шасці месяцаў з дня выдання адпаведнага загада.

На сёння адпрацоўка на падставе размеркаванні абавязковая толькі для выпускнікоў ВНУ, каледжаў, прафтэхвучылішчаў, якія навучаліся за кошт бюджэту. Тыя, хто навучаецца праз мэтавае накіраванне ў ВНУ, абавязаныя адпрацаваць на падставе размеркавання 5 і больш гадоў (у залежнасці ад тэрміну, прапісанага ў дагаворы аб падрыхтоўцы спецыяліста), астатнія бюджэтнікі — 2 гады.

Кожны выпускнік пасля размеркавання атрымлівае статус маладога спецыяліста, які дае права на адпачынак пасля заканчэння навучання, на грашовую дапамогу ў памеры стыпендыі, на першачарговае атрыманне арэнднага жылля з камунальнага жыллёвага фонду. Акрамя таго, прадугледжанае частковае грашовае кампенсаванне за арэнду жылля, калі выпускнік адпраўляецца на падставе размеркавання ў населены пункт, дзе не мае месца пражывання.

Магчымасці наймальніка звольніць маладога спецыяліста, перавесці яго на працу, не звязаную з атрыманай спецыяльнасцю, абмежаваныя.