З вечара 9 ліпеня ў Гомельскую вобласць заляцела больш за 20 расійскіх БПЛА — СМІ
10 ліпеня, Позірк. Больш за 20 расійскіх беспілотных лятальных апаратаў заляцела ў Гомельскую вобласць з Украіны з вечара 9 ліпеня, паведамляе рэгіянальнае медыя “Флагшток” са спасылкай на мясцовых жыхароў.
Удакладняецца, што пяць БПЛА “вярнулася ва Украіну”, “астатнія, верагодна, упалі або былі збітыя на тэрыторыі Беларусі”.
“Першы [беспілотнік] увайшоў у паветраную прастору рэспублікі ў 20:18 9 ліпеня, апошні — у 02:03 10 ліпеня”, — адзначае медыя.
Жыхары Гомеля, на якіх спасылаецца СМІ, паведамілі, што чулі гук “мапеда” над Навабеліцай, Сельмашаўскім і Валатаўскім мікрараёнах. Відавочцы адзначалі “няроўную працу рухавіка і абмяркоўвалі колькасць БПЛА над горадам” — некаторыя, як заяўляецца, налічылі шэсць “шахедаў”, але “гэта мог быць адзін і той жа дрон, які кружыў вакол Гомеля”.
Сцвярджаецца, што гук беспілотніка быў чутны ў абласным цэнтры на працягу паўтары гадзіны.
На працягу такога ж часу жыхары Рэчыцы (Гомельская вобласць) таксама чулі пралёты БПЛА і сцвярджалі, што беспілотнікаў было “як мінімум тры”.
Раней “Флагшток” паведамляў, што мінімум 12 расійскіх ударных беспілотнікаў перасякалі паветраную прастору Беларусі праз Гомельскую вобласць з боку Украіны раніцай 8 ліпеня.
Днём 3 чэрвеня, як паведамляла медыя, у раёне вёскі Ратміравічы, на мяжы Глускага і Кастрычніцкага раёнаў, “удалося верыфікаваць выпадак падзення БПЛА”.
13 красавіка ў эфіры тэлеканала СТБ камандуючы Ваенна-паветранымі сіламі і войскамі супрацьпаветранай абароны Узброеных сіл Андрэй Лук’яновіч заявіў, што ў 2025 годзе Міністэрства абароны зафіксавала 128 парушэнняў дзяржаўнай мяжы ў паветранай прасторы.
У Беларусь “вельмі часта” залятаюць БПЛА з тэрыторыі Украіны, заявіў 23 сакавіка намеснік міністра ўнутраных спраў — камандуючы ўнутранымі войскамі Мікалай Карпянкоў.
Карпянкоў дэ-факта прызнаў, што беларуская сістэма абароны не спраўляецца з такімі баявымі дронамі. Іх паходжанне ён не назваў.
2 сакавіка “Флагшток” са спасылкай на свае крыніцы паведаміў, што маштабнае адключэнне цеплазабеспячэння ў Мазыры (Гомельская вобласць) 27–28 лютага было звязана з падзеннем расійскага беспілотніка.
“Гэты інцыдэнт стаў першым верыфікаваным выпадкам, калі з-за БПЛА быў нанесены ўрон энергетычнай сістэме Беларусі. Дзеючыя ўлады аддалі перавагу схаваць інфармацыю аб прычынах маштабнай аварыі”, — гаварылася ў матэрыяле.
Аб “пашкоджанні цеплавой магістралі дыяметрам 700 мм” афіцыйна паведамлялася 28 лютага. ДзяржСМІ і тэлеграм-канал Мінэнерга адзначалі, што “для каардынацыі дзеянняў быў створаны штаб”, аднаўленчыя работы былі “паспяхова завершаныя”, “у 03:30 цеплазабеспячэнне ўсіх спажыўцоў адноўлена ў поўным аб’ёме”.
Прычыны здарэння не называліся.
Раней “Флагшток” паведамляў, што невядомы лятальны апарат ноччу 27 лютага ўпаў на гаспадарчую пабудову ў Гомельскім раёне і выбухнуў, адбыўся пажар.
4 кастрычніка мінулага года Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна, украінскія яны ці расійскія.
