Ціханоўскія заклікалі пашырыць санкцыі ў дачыненні да рэжыму Лукашэнкі
10 ліпеня, Позірк. Працягваць ціск на рэжым Аляксандра Лукашэнкі, “захаваць санкцыі ў сіле і пашырыць там, дзе гэта неабходна”, — асабліва ў дачыненні да “тых, хто фінансуе рэпрэсіі”, заклікалі ў сумесным артыкуле для італьянскага выдання Il Foglio дэмакратычны лідар Святлана Ціханоўская і яе муж, былы палітвязень Сяргей Ціханоўскі.
Яны выступілі за тое, каб “эліце рэжыму і яго памагатым не было дазволена выязджаць, інвеставаць або адмываць сваю рэпутацыю за мяжой, працягваючы парушаць асноўныя правы чалавека дома”.
Любую нармалізацыю адносін з Мінскам Ціханоўскія заклікалі ўвязаць з “канкрэтнымі вынікамі”, пачынаючы “з поўнага і безумоўнага” вызвалення палітвязняў — “не некаторых, не самых вядомых, а ўсіх”.
Ціханоўскія заявілі таксама пра неабходнасць падтрымліваць беларускую грамадзянскую супольнасць, незалежныя СМІ, дэмакратычныя структуры ў выгнанні. “Нягледзячы на велізарныя праблемы, у эміграцыі дзейнічае ўстойлівы рух за перамены, які мае патрэбу ў рэсурсах, абароне і палітычным прызнанні”, — гаворыцца ў артыкуле.
“Важнасць справядлівасці патрабуе афіцыйнага прызнання. Беспакаранасць толькі заахвочвае новыя злачынствы. Мы працягваем падтрымліваць стварэнне міжнародных механізмаў падсправаздачнасці. Пацярпелыя беларусы заслугоўваюць праўды, справядлівасці і ўрэшце прымірэння”, — падкрэслілі аўтары.
У публікацыі падкрэсліваецца, што “пакуль апошні зняволены не выйдзе на волю, Беларусь не будзе свабоднай”.
У інтэрв’ю выданню Politico, якое было апублікавана 7 ліпеня, Ціханоўская заклікала прэзідэнта ЗША Дональда Трампа працягваць аказваць ціск на Лукашэнку.
“Не нармалізуйце сітуацыю, калі людзей вызваляюць за нейкія саступкі з вашага боку, змякчэнне санкцый або публічную ўвагу. Лукашэнку трэба караць, а не ўзнагароджваць”, — падкрэсліла дэмлідар.
Некаторыя эксперты, як адзначае выданне, асцерагаюцца, што пасля вызвалення Сяргея Ціханоўскага, які адбыўся пасля візіту ў Мінск спецпрадстаўніка прэзідэнта ЗША Кіта Келага, адміністрацыя Трампа аслабіць ціск у дачыненні да рэжыму Лукашэнкі.
У сувязі з гэтым Ціханоўская заклікала адміністрацыю Трампа “адкінуць спробы Лукашэнкі ўстанавіць легітымнасць”.
Пра вызваленне 14 палітвязняў стала вядома неўзабаве пасля сустрэчы Лукашэнкі і Келага 21 чэрвеня.
Сярод вызваленых — відэаблогер Сяргей Ціханоўскі, былы супрацоўнік “Радыё Свабода” Ігар Карней, выкладчыца італьянскай мовы Наталля Дуліна, актывіст анархісцкага руху Акіхіра Гаеўскі-Ханада, уладальніца беларускага і шведскага грамадзянства Галіна Краснянская, бізнесмен Сяргей Шэлег, удзельнік закрытага чата “Саюз беларускага нацыянальнага шчыта” Кірыл Балахонаў.
Таксама былі вызваленыя Алан Ройё (грамадзянін Эстоніі), Юрыйс Ганінс і Дзмітрыйс Міхайлаўс (грамадзяне Латвіі). Акрамя таго, паводле звестак СМІ, на волю выйшаў Ежы Жывалеўскі (грамадзянін Польшчы).
Імёны яшчэ траіх афіцыйна не названыя, яны з’яўляюцца грамадзянамі Польшчы (двое) і Японіі.
