Мінпрыроды дэ-факта пацвердзіла адсутнасць у Белгідрамета абсталявання для доўгатэрміновых прагнозаў

9 ліпеня, Позірк. Міністэрства прыродных рэсурсаў і аховы навакольнага асяроддзя дэ-факта пацвердзіла адсутнасць у Белгідрамета (падпарадкаваная структура) абсталявання для доўгатэрміновых прагнозаў.

У адрозненне ад кароткатэрміновых прагнозаў надвор’я, якія выпускаюць спецыялісты кожнай з нацыянальных гідраметэаралагічных службаў, доўгатэрміновыя прагнозы — “складаная, рэсурсаёмістая задача, для яе вырашэння аб’ядноўваюцца намаганні розных краін“, гаворыцца ў паведамленні ведамства, апублікаваным дзяржаўнымі СМІ.

“З 193 членаў Сусветнай метэаралагічнай арганізацыі (СМА) глабальныя сезонныя прагнозы сёння выпускаюць усяго трынаццаць цэнтраў доўгатэрміновых прагнозаў: Бразіліа (Бразілія), Вашынгтон (ЗША), Мэльбурн (Аўстралія), Манрэаль (Канада), Масква (Расія), Афенбах (Германія), Пекін (КНР), Прэторыя (ПАР), Рэдынг (Вялікабрытанія), Сеул (Ю.Карэя), Токіа (Японія), Тулуза (Францыя), Эксетэр (Вялікабрытанія)“, — адзначаецца ў прэс-рэлізе.

На прэс-канферэнцыі 7 ліпеня начальнік аддзела вывучэння змяненняў клімату службы метэаралагічнага і кліматычнага маніторынгу, фонду даных Белгідрамета Вольга Бакланава не змагла адказаць на пытанне аб прагнозе надвор’я на другую палову 2025 года, ці трэба рыхтавацца “да нечага незвычайнага, напрыклад зацяжных ападкаў або моцнай засухі“. “На жаль, мы не валодаем такімі праграмнымі комплексамі, якія б разлічвалі, дапусцім, на ацяпляльны перыяд, на цёплы перыяд. На жаль, няма такіх прагнозаў у рэспубліцы пакуль, у Белгідрамеце ў прыватнасці”, — сказала Бакланава.

Гэты адказ апублікаваў “Позірк“, а на наступны дзень з’явілася тлумачэнне Мінпрыроды, якое апісала механізм як выпуску, так і атрымання доўгатэрміновых прагнозаў, які не прыгадала Бакланава: “У далейшым СМА праз рэгіянальныя кліматычныя цэнтры распаўсюджвае доўгатэрміновыя прагнозы для краін — членаў гэтай міжнароднай арганізацыі. У Еўропе функцыі аднаго з вузлоў рэгіянальнай кліматычнай сеткі выконвае Паўночна-Еўразійскі кліматычны цэнтр (Расія), які забяспечвае доўгатэрміновымі прагнозамі краіны СНД. Двойчы ў год — у канцы траўня на летні сезон і ў канцы лістапада на зімовы сезон. Арганізоўваецца Паўночна-Еўразійскі кліматычны форум, які аб’ядноўвае намаганні навукоўцаў і спецыялістаў у галіне доўгатэрміновага прагназавання для складання сезонных прагнозаў. Спецыялісты Белгідрамета з’яўляюцца пастаяннымі ўдзельнікамі названага форуму”.

Між тым дзяржаўнае агенцтва “Мінск-Навіны“ назвала сказанае Бакланавай “чуткамі“ і “фэйкам“. Мяркуючы па змесце публікацыі, яе аўтар Наталля Сямёнава палічыла, што гаворка ішла пра адсутнасць у Белгідрамета абсталявання ў прынцыпе (цытата: “У сетцы сталі распаўсюджвацца чуткі аб тым, што ў Белгідрамета адсутнічае абсталяванне, з-за чаго немагчыма даць карэктны прагноз надвор’я“).