Дзяржаўтаінспекцыя на працягу трох дзён будзе правяраць працу маршрутных таксі

8 ліпеня, Позірк. Комплекс “прафілактычных мерапрыемстваў, скіраваных на падвышэнне бяспекі перавозак пасажыраў” маршрутнымі таксі праводзіць 8–10 ліпеня Дзяржаўтаінспекцыя, паведамляе прэс-служба Міністэрства ўнутраных спраў.

Паводле інфармацыі ведамства, у гэты перыяд “супрацоўнікі ДАІ арганізуюць штодзённы кантроль выканання ПДР кіроўцамі, якія ажыццяўляюць перавозкі пасажыраў у рэгулярных зносінах”.

“Асноўную ўвагу інспектары звярнуць на спыненне грубых парушэнняў Правілаў дарожнага руху: кіраванне транспартам у стане ап’янення, недатрыманне вызначанай хуткасці, перавозку пасажыраў, што не прышпіленыя рамянямі бяспекі ў міжгародніх і прыгарадных зносінах, няспраўным транспартам або пры ўмове, калі ўдзел у дарожным руху забаронены”, — гаворыцца ў паведамленні.

Паводле даных МУС, падчас аналагічнага комплексу мерапрыемстваў у сакавіку было выяўлена 1.290 правапарушэнняў, з якіх 449 (35%) было звязана з парушэннямі выкарыстання рамянёў бяспекі.

Сёлета ў Беларусі здарылася сама меней чатыры аварыі з удзелам маршрутак, у якіх пацярпелі людзі. Гэтыя выпадкі адбыліся 27 траўня ў Смалявіцкім раёне (шпіталізавана 3 чалавекі), 20 траўня ў Гродне (7), 12 лютага ў Мінску (5), 19 студзеня ў Мінскім раёне (7).