Лукашэнка ў Дзень незалежнасці абвінаваціў Захад у намеры “спаліць некалькі мільёнаў” чалавек

3 ліпеня, Позірк. Прыклад “гераічных продкаў паказвае”, што “за будучыню трэба змагацца”, заявіў Аляксандр Лукашэнка, выступаючы 3 ліпеня на мемарыяльным комплексе “Курган Славы” пад Мінскам на цырымоніі з нагоды Дня незалежнасці.

Паводле яго слоў, чалавек “заўсёды можа і павінен супрацьстаяць злу, якім бы моцным і абвостраным” яно ні было.

“Сёння свет знаходзіцца на крутым пераломе, і ніхто не ведае, з чым мы сутыкнемся заўтра. Вы бачыце, што робіцца вакол нас, — заявіў Лукашэнка (на падставе жывой трансляцыі ў дзяржаўных СМІ). — Захад зноў вырашыў усе свае даўгі і праблемы спаліць у сусветным пажары і адначасова спаліць некалькі мільёнаў жыхароў нашай планеты. Задача ўсіх людзей добрай волі, у першую чаргу моладзі, аб’яднацца, спыніць вар’ятаў — у імя будучыні ўсяго чалавецтва”.

Спікер ніяк не падмацаваў свае галаслоўныя абвінавачанні. У той жа час ён не згадаў пра тое, што яго бліжэйшы саюзнік — Расія — у лютым 2022 года развязала поўнамаштабную вайну супраць Украіны. Рэжым Лукашэнкі падтрымлівае расійскую агрэсію.

Паводле сцвярджэння палітыка, Дзень незалежнасці Беларусі — гэта “знак свабоды і незалежнасці”, які “ўвасабляе памяць пра подзвіг народа-пераможцы і вечную падзяку нашчадкаў”.

“Мы ганарымся нашымі ветэранамі і ўсімі, хто падарыў нам магчымасць жыць і працаваць на сваёй зямлі. Яны паказалі свету прыклады небывалай доблесці, трываласці, патрыятызму, — сказаў ён. — Нам трэба любой цаной захаваць і перадаць будучым пакаленням веру ў пераможны дух продкаў, уласныя сілы і ў тое, што разам мы дадзім рады любым выклікам. Нам ні ў якім разе нельга страціць гэтую перамогу, гэта годнасць нашага народа, знак яго велічы”.

Мір, свабода і незалежнасць, паводле слоў Лукашэнкі, з’яўляюцца “спадчынай і найвялікшай каштоўнасцю”, якія “трэба берагчы і абавязкова абараняць”. Адметна, што дзеянні рэжыму ў Мінску фактычна пазбавілі беларускі народ гэтых каштоўнасцяў. Што тычыцца міру, то падтрымка, якую рэжым Лукашэнкі аказвае Крамлю ў вайне супраць украінскага народа, фактычна зрабіла Беларусь суагрэсарам; у краіну перыядычна залятаюць расійскія баявыя беспілотнікі. Свабода і незалежнасць таксама знаходзяцца пад пагрозай з прычыны таго, што Мінск усё мацней збліжаецца з Масквой у палітычнай, эканамічнай, вайсковай сферах.

Лукашэнка на цырымоніі заклікаў “умацоўваць народнае адзінства, эканоміку, абарону” Беларусі — “кожны дзень, кожную гадзіну”. У гэтым, паводле яго слоў, заключаецца “доўг сучаснікаў перад мінулым і будучым, каб жыла і квітнела <…> любімая Беларусь”.

“Калі мы ўсе разам прасякнемся гэтым пачуццём — вось гэтыя дзеткі, якія ўступаюць у жыццё, больш дарослыя і мы — разам мы захаваем нашу краіну, ціхую, спакойную, пад мірным блакітным небам”, — заявіў спікер.