Лукашэнка даў аблвыканкамам і Мінгарвыканкаму дадатковыя паўнамоцтвы ў сферы будаўніцтва

3 ліпеня, Позірк. Дадатковыя паўнамоцтвы ў сферы будаўніцтва даў Аляксандр Лукашэнка аблвыканкамам і Мінскаму гарвыканкаму.

2 ліпеня ён падпісаў указ № 266 “Аб наданні паўнамоцтваў у сферы будаўніцтва“, які дазваляе чыноўнікам гэтых выканаўчых органаў па ўзгадненні з Саветам міністраў прымаць рашэнні “аб вызначэнні асаблівасцяў ўзвядзення і рэканструкцыі аб’ектаў, якія патрабуюць першачарговага будаўніцтва для развіцця адпаведнага рэгіёну”, паведаміла прэс-служба палітыка.

Гэта могуць быць рашэнні аб магчымасці паралельнай распрацоўкі праектнай дакументацыі і будаўніцтва, адначасовага правядзення праектных, пошукавых работ і афармлення папярэдняга ўзгаднення месца размяшчэння зямельнага ўчастка, праектавання і будаўніцтва з распрацоўкай перадпраектнай дакументацыі ў скарочаным аб’ёме.

Згодна з дакументам магчыма таксама вызваленне ад пакрыцця страт сельскагаспадарчай і лясной вытворчасці пры канфіскацыі сельгасзямель і лясных зямель, узгадненне выдалення расліннасці без кампенсацыі пры будаўніцтве аб’ектаў, наданне права на дзяржзакупкі з адной крыніцы праектаў, тавараў (работ, паслуг), звязаных з будаўніцтвам аб’ектаў.

Абласныя і Мінскі гарадскі Саветы дэпутатаў атрымалі права вызначаць неабходнасць правядзення грамадскіх абмеркаванняў па аб’ектах “са спецыфікай праектавання і будаўніцтва“.

Традыцыйна ўстанаўліваецца персанальная адказнасць кіраўнікоў органаў улады за неналежнае выкананне прынятых рашэнняў.