Лукашэнка: Мы вывучаем досвед войнаў, выкарыстоўваем усё, што можа ўзмацніць нашу і расійскую абарону
1 ліпеня, Позірк. За тры дзесяцігоддзі ў Беларусі створанае “сучаснае, баяздольнае, добра ўзброенае войска”, якое гатовае “даць самы жорсткі адпор” на “любыя агрэсіўныя выпады”, заявіў Аляксандр Лукашэнка 1 ліпеня ў Мінску на цырымоніі ўшаноўвання выпускнікоў найвышэйшых вайсковых навучальных устаноў і найвышэйшага афіцэрскага складу.
Паводле слоў палітыка, якія прыводзіць яго прэс-служба, “ракеты, самалёты і беспілотнікі — гэта добра, але лёс любога бою або вайны будзе вырашаць камандзір і яго падначаленыя — салдаты”.
“Мы пастаянна вывучаем досвед сучасных войнаў, аналізуем і выкарыстоўваем усё, што можа ўзмацніць нашу і расійскую абарону, — заявіў ён. — Гаворка ідзе пра тэхніку і ўзбраенні і, што не менш важна, пра прафесіяналізм, згуртаванасць, маральна-валявыя якасці салдат і афіцэраў”.
Лукашэнка зноў абвінаваціў Захад у мілітарызацыі, не згадаўшы, што на пераўзбраенне Еўропы паўплывала поўнамаштабная вайна Расіі супраць Украіны, у якой рэжым у Мінску падтрымлівае Крэмль. “Мы таксама бачым, што “асвечаныя” еўрапейцы маюць намер і далей працягваць бессэнсоўную бойню ва Украіне. Як яны, ужо не маскуючыся і не саромеючыся, заяўляюць — да апошняга ўкраінца”, — у чарговы раз паўтарыў спікер наратыў расійскай прапаганды.
Паводле слоў Лукашэнкі, многія сённяшнія выпускнікі, у прыватнасці, Ваеннай акадэміі ў верасні “возьмуць удзел у значным мерапрыемстве аператыўнай падрыхтоўкі — сумесным стратэгічным вучэнні ўзброеных сіл Беларусі і Расіі “Захад-2025”.
28 траўня міністр абароны Віктар Хрэнін заявіў, што параметры вучэнняў “Захад-2025” зніжаныя, а самі манеўры перанесеныя ад межаў углыб Беларусі.
Расійскае ваеннае ўварванне ва Украіну ў лютым 2022 года часткова ажыццяўлялася з тэрыторыі Беларусі пасля заканчэння сумесных вайсковых вучэнняў.
