Афіцыйны курс долара ў Беларусі за першую палову 2025 года знізіўся на 14,6% — другое месца на тэрыторыі былога СССР
1 ліпеня, Позірк. На 14,60% (з 3,4735 да 2,9663 рубля) знізіўся афіцыйны курс долара ЗША ў Беларусі за першую палову 2025 года. Гэта другі паказчык на тэрыторыі былога СССР, сведчыць праведзены “Позіркам” параўнальны аналіз катыровак цэнтрабанкаў на 31 снежня 2024 года і 30 чэрвеня 2025-га (па выніках студзеня, студзеня — лютага, першага квартала, студзеня — красавіка і студзеня — траўня таксама другое месца; -1,73%, -8,54%, -10,25%, -12,16% і -13,72% адпаведна).
На першым месцы Расія, дзе долар за шэсць месяцаў афіцыйна патаннеў на 22,83% (са 101,6797 да 78,4685 рубля).
У чэрвені амерыканская валюта ў Беларусі патаннела на 1,02% — пятае месца пасля Латвіі, Літвы, Эстоніі (-3,25%) і Малдовы (-2,76%).
Даведачна: у Польшчы долар у чэрвені патаннеў на 3,66%, за паўгоддзе — на 11,82% (з 4,1012 да 3,6164 злотага).
У студзені — чэрвені 2024 года Беларусь заняла пятае месца па зніжэнні курсу амерыканскай валюты на прасторы былога СССР (-0,48%, з 3,1775 да 3,1624 рубля), па выніках года — чацвёртае па росце (+9,32%).
У 2023 годзе Беларусь была другой па росце афіцыйнага курсу долара (+16,12%), у 2022-м — трэцяй (+7,39%), у 2021 годзе — чацвёртай сярод краін, дзе долар патаннеў (-1,19%), у 2020-м — першай па яго падаражэнні (+22,59%).
