У Польшчы пры ўдзеле Інтэрпола канфіскаваная ўвезеная з Беларусі медыцынская прадукцыя

30 чэрвеня, Позірк. З лістапада 2024 года па травень 2025-га супрацоўнікамі Нацыянальнай падатковай адміністрацыі Польшчы (НПА) у ходзе кантрольных мерапрыемстваў канфіскавана каля 60 тыс. адзінак фармацэўтычнай і іншай медыцынскай прадукцыі, нелегальна ўвезенай на тэрыторыю краіны.

У паведамленні НПА адзначаецца, што больш за ўсё такой прадукцыі было дастаўлена ў Польшчу з Індыі і Украіны, далей ідуць ЗША, Паўднёвая Карэя, Расія і Беларусь.

Паведамляецца, што найбольшая група канфіскаваных тавараў — гэта “стрававальныя сродкі, сродкі для нервовай сістэмы, уключаючы псіхастымулятары, антытрывожныя прэпараты, дыетычныя дабаўкі, раслінныя прадукты і псіхатэрапеўтычныя сродкі”.

Іншыя канфіскаваныя тавары ўключаюць “анабалічныя стэроіды, абязбольвальныя і прэпараты для лячэння іншых разладаў”. Таксама канфіскаваныя “адсмоктвальнікі для ачысткі дыхальных шляхоў, хірургічныя прасціны, інгалятары, сагравальныя пластыры, іголкі і шпрыцы”. Акрамя гэтага, значную групу складалі ветэрынарныя тавары.

Кошт канфіскаванай прадукцыі перавысіў 800 тыс. злотых (больш за 220 тыс. долараў).

Аператыўныя мерапрыемствы праводзіліся ў тым ліку ў пунктах сартавання пасылак, аэрапортах, лагістычных цэнтрах, на памежных пераходах і дарогах.

Падкрэсліваецца, што канфіскаваная прадукцыя небяспечная для здароўя і жыцця, у асноўным яна прызначалася для спажыўцоў у Польшчы і іншых краінах ЕС.

У паведамленні гаворыцца, што аперацыя па канфіскацыі згаданых тавараў праводзілася па лініі Інтэрпола.