Ціханоўскі: Я зламаю гэты рэжым (дапоўнена)

27 чэрвеня, Позірк. “Я зламаю гэты рэжым“, — заявіў былы палітвязень, відэаблогер, аўтар праекта “Краіна для жыцця” Сяргей Ціханоўскі на мітынгу беларусаў Варшавы ўвечары 26 чэрвеня.

“Асабіста я збіраюся гэты рэжым зламаць, як і той турэмны. Калі вы будзеце слаба дапамагаць ці не будзеце дапамагаць наогул, я ўсё роўна буду ламаць гэты рэжым“, — сказаў ён.

Ціханоўскі выказаў суайчыннікам падзяку за сваё вызваленне, аднак адзначыў, што не бачыць у іх столькі аптымізму і веры, як у 2020 годзе. “Калі вы ў мяне паверыце, я абяцаю зрабіць усё, каб вы вярнуліся ўсе ў Беларусь і там былі сапраўдныя, сумленныя, дэмакратычныя выбары“, — сказаў Ціханоўскі. Паводле яго слоў, ёсць вялікая розьніца паміж беларусамі, якіх ён бачыў у Гродне 29 траўня 2020 году, перад затрыманнем, і цяперашнімі. “Тыя беларусы верылі ў перамены, а гэтыя беларусы, як я гляджу, нейкія прыгнечаныя, запалоханыя. Давайце ўжо, хлопцы, усё ж такі, калі мы хочам нешта зрабіць, пазбавімся гэтага пачуцця. У мяне яго не было, няма і ніколі не будзе“, — заявіў Ціханоўскі.

Былы палітвязень паведаміў пра намер здзейсніць “маленькае турнэ” па Польшчы, Германіі, ЗША, Канадзе для сустрэч з беларусамі. Ён таксама збіраецца пагаварыць з журналістамі і блогерамі, каб яны “наперад ведалі, што будзе адбывацца“.

Ціханоўскі коратка распавёў пра сваё ўтрыманне ў калоніі і становішча іншых вязняў: “Вы не ўяўляеце, што там дзеецца. На самай справе хоць мой рэжым і можна назваць “жэстачайшым” (я яго так называў), калі няма ні лістоў, ні званкоў, ні адвакатаў, не можаш купіць ні чай, ні кава, ні зубную шчотку, ні мыла — гэта кашмар. Але выяўляецца — я ўжо зараз пагутарыў з іншымі, хто выйшаў — у мяне гэта быў яшчэ літаслівы рэжым, таму што мяне не білі і мне не трэба было рэзаць сябе, як гэта рабілі іншыя, каб трапіць у бальніцу. Людзі ў такім стане знаходзяцца, і ніхто пра іх не ведае“. Пасля гэтых слоў Ціханоўскі заплакаў.

Блогер плануе заняцца пытаннямі вызвалення астатніх палітвязняў. Паводле яго сцвярджэння, рэжым мае намер вызваліць усіх, што дазволіць весци размову пра зняцце часткі санкцый.

“Пра тое, што трэба рабіць, я ўжо сказаў прэзідэнту Дудзе, пану [міністру замежных спраў] Сікорскаму. Я скажу тут кожнаму прэм’еру і прэзідэнту ў Еўрасаюзе, ЗША, Канадзе і іншых краінах: падрыхтуйце новы, магутны пакет санкцый супраць дыктатара Лукашэнкі. Не ўводзіце іх, прынясіце яму, пакладзеце на стол і скажыце: калі гэтыя палітвязні не выйдуць, то мы іх увядзем. Навошта табе гэтая тысяча чалавек, калі ты ўжо выпусціў 300?” — сказаў прамоўца.

На мітынг у цэнтр польскай сталіцы Ціханоўскі прыйшоў са сваёй жонкай Святланай, якая таксама выступіла перад прысутнымі, падзякаваўшы за вызваленне мужа прэзідэнтам ЗША і Польшчы, еўрапейскім палітыкам і простым беларусам.

Яе намеснік у Аб’яднаным пераходным кабінеце, кіраўнік Народнага антыкрызіснага ўпраўлення Павел Латушка параўнаў Ціханоўскага са знішчальнікам F-35. “У нас ёсць права здацца, калі ён вытрымаў пяць гадоў? Няма. Дык вось, да гэтага F-35 мы будзем прыкладаць ядзерную бомбу”, — заявіў Латушка.