Спецдакладчык ААН: Трэба працягваць ціск на рэжым Лукашэнкі, каб павысіць для яго кошт працягу рэпрэсій

27 чэрвеня, Позірк. Падтрымаць людзей у Беларусі можна, падтрымліваючы СМІ ў выгнанні, таму што беларусам патрэбна інфармацыя пра тое, што адбываецца ў іх краіне і ў свеце. Неабходна працягваць ціск на рэжым у Беларусі, каб павысіць для яго кошт працягу рэпрэсій. Пра гэта заявіў у заключным слове пасля прэзентацыі свайго дакладу спецыяльны дакладчык ААН па пытанні аб становішчы ў галіне правоў чалавека ў Беларусі Нілс Муйжніекс. Мерапрыемства прайшло 26 чэрвеня на 59-й сесіі Савета ААН па правах чалавека (СПЧ) у Жэневе (Швейцарыя).

Муйжніекс падкрэсліў неабходнасць “трымаць сітуацыю з правамі чалавека ў Беларусі на парадку дня ў ААН і іншых рэгіянальных арганізацыях, такіх як АБСЕ, ЕС, Савет Еўропы і іншых”.

Як паведамляў “Позірк“, дэлегацыя беларускіх уладаў на абмеркаванні дакладу адсутнічала.

Адказваючы на пытанне, як падтрымаць беларусаў у выгнанні, Муйжніекс адзначыў: “Перш за ўсё, не адпраўляйце іх назад у Беларусь, асабліва калі яны зведваюць там рызыку жорсткага абыходжання, не супрацоўнічайце з беларускімі ўладамі ў злоўжыванні “чырвонымі апавяшчэннямі“ Інтэрпола, у адпраўцы людзей назад“.

Спецдакладчык заявіў пра важнасць фінансавання грамадзянскай супольнасці ў выгнанні, якое цяпер даволі абмежаванае, асабліва пасля таго, як адміністрацыя Злучаных Штатаў зрэзала яго для СМІ і моладзевых груп.

Ён назваў “даволі жахлівым” становішча праваабаронцаў у Беларусі. “У краіне іх засталося вельмі мала. Яны трымаюцца вельмі ціха. Некаторыя ўсё яшчэ працуюць, спрабуючы не трапіцца на вочы ўладам“, — адзначыў спецдакладчык.

Кажучы пра тое, што трэба зрабіць для змены сітуацыі ў Беларусі, ён падкрэсліў неабходнасць “выразнага сігналу, што вызвалення людзей недастаткова”.

“Вы павінны спыніць рэпрэсіі, якія працягваюцца, каб у будучыні не спатрэбілася далейшых вызваленняў, а гэта патрабуе змены законаў, у прыватнасці законаў аб барацьбе з тэрарызмам, паклёпе, экстрэмізме“, — лічыць Муйжниекс.

На яго думку, рэжым павінен разумець, што садзейнічанне нелегальнай міграцыі, любое жорсткае абыходжанне з беларусамі ўнутры краіны будзе пакаранае.

Разважаючы пра найбольш эфектыўныя спосабы вызвалення палітвязняў, ён заявіў, што ў першую чаргу неабходна “спыніць з’яўленне новых палітвязняў, у адваротным выпадку мы ствараем сітуацыю закладнікаў, якая будзе доўжыцца доўгі час“.

Муйжніекс прадставіў свой даклад аб сітуацыі з правамі чалавека ў Беларусі 26 чэрвеня на 59-й сесіі Рады ААН для “інтэрактыўнага дыялогу“.

Пасля заканчэння мерапрыемства Муйжніекс зрабіў запіс у сацсетцы LinkedIn: “Я толькі што правёў інтэрактыўны дыялог з Радай ААН па правах чалавека па маім першым дакладзе па Беларусі. Было шмат пытанняў ад дружалюбных дзяржаў, але ніякага ўдзелу з боку Беларусі. Было кранальна пачуць відэазварот нядаўна вызваленага палітвязня Сяргея Ціханоўскага. Беларусь павінна вызваліць усіх палітвязняў!“

Іншыя падрабязнасці даступныя (https://mstagmanager.com/be/news/144297/) падпісчыкам “Позірк+“