Дэлегацыя афіцыйнага Мінска адсутнічала на выступленні ў ААН спецдакладчыка па Беларусі
Старшыня пытаецца пра наяўнасць беларускай дэлегацыі і шукае яе вачыма. Злева — спецдакладчык Нілс Муйжніекс
26 чэрвеня, Позірк. Сітуацыя з правамі чалавека ў Беларусі застаецца цяжкай, ніякіх прыкмет прагрэсу няма, заявіў спецыяльны дакладчык ААН па пытанні аб становішчы ў галіне правоў чалавека ў Беларусі Нілс Муйжніекс 26 чэрвеня на 59-й сесіі Савета ААН па правах чалавека (СПЧ) у Жэневе (Швейцарыя).
Муйжніекс праінфармаваў аб апублікаваным дакладзе аб парушэннях правоў чалавека ў Беларусі і заявіў, што “спрабаваў супрацоўнічаць з уладамі Беларусі“, але яны праігнаравалі яго запыты на наведванне краіны ці сустрэчу з ім у Жэневе.
“Я таксама спрабаваў накіроўваць ім розныя лісты, але іх адказы практычна заўсёды былі фармальнымі і не ўтрымліваюць ніякай інфармацыі. Я ўвесь час спрабую таксама задзейнічаць і іншых мандатарыяў у маёй камунікацыі з беларускімі ўладамі для таго, каб не было абвінавачвання ў селектыўнасці або ў суб’ектыўнасці“, — адзначыў спецдакладчык.
Муйжніекс паведаміў, што збірае інфармацыю для дакладу, які “будзе ў значнай ступені паўтараць змест гэтага дакладу, але таксама будзе прысвечаны пытанням правоў чалавека ў сферы працы і занятасці ў Беларусі, уключаючы выкарыстанне прымусовай працы, прафесійныя абмежаванні правоў прафсаюзаў і правоў працоўных мігрантаў“.
“На канец справаздачнага перыяду ў Беларусі налічвалася каля 1.200 палітвязняў. Калі гэтыя лічбы хаця б прыблізна дакладныя, а я лічу, што яны верныя, Беларусь, верагодна, мае самую вялікую колькасць палітычных зняволеных на душу насельніцтва ў свеце“, — заявіў спецдакладчык.
Пасля прэзентацыі дакладу слова атрымала дэлегацыя афіцыйнага Мінска, аднак прадстаўнікоў Беларусі ў зале не аказалася. Затым пачалася дыскусія, на якой выступілі прадстаўнікі Латвіі, Малдовы, Украіны, Польшчы, Румыніі, Албаніі і іншых краін.
У апублікаваным у траўні першым дакладзе Муйжніекса на пасадзе спецдакладчыка быў прадстаўлены агляд асноўных падзей у галіне правоў чалавека ў краіне з 1 красавіка 2024-га па 31 сакавіка 2025 года.
Інфармацыя “сведчыць аб тым, што прэзідэнцкія выбары, якія адбыліся 26 студзеня 2025 года, не могуць лічыцца адпаведнымі праву абіраць і быць абраным на сапраўдных перыядычных выбарах, гарантаваным артыкулам 25 Міжнароднага пакта аб грамадзянскіх і палітычных правах, з-за палітычных рэпрэсій і поўнага падаўлення свабоды выказвання меркаванняў, сходаў і асацыяцыі“.
3 красавіка СПЧ на сваёй 58-й сесіі большасцю галасоў прыняў рэзалюцыю “Становішча ў галіне правоў чалавека ў Беларусі”.
Савет, у прыватнасці, пастанавіў падоўжыць мандат спецыяльнага дакладчыка па пытанні аб становішчы ў галіне правоў чалавека ў Беларусі на яшчэ адзін год, пачынаючы з канца сваёй 59-й сесіі (11 ліпеня 2025 года), і папрасіў яго прадставіць даклад аб становішчы ў галіне правоў чалавека ў Беларусі СПЧ на яго 62-й сесіі (лета 2026 года) і Генасамблеі на яе 81-й сесіі (2026-2027 гады).
