25 чэрвеня, Позірк. Пра сустрэчу Святланы Ціханоўскай з міністрам замежных спраў Эстоніі Маргусам Цакхной 25 чэрвеня на палях саміту НАТО ў Гаазе (Нідэрланды) паведаміў “Позірку” галоўны дарадца беларускага дэмакратычнага лідара Франак Вячорка.
Паводле яго слоў, Ціханоўская абмеркавала з міністрам нядаўняе вызваленне ў Беларусі палітвязняў, сярод якіх быў грамадзянін Эстоніі Алан Ройё, і вырашэнне пытанняў легалізацыі беларусаў у гэтай балтыйскай краіне.
Таксама палітык падзякавала Эстоніі за адкрыццё прадстаўніцтва дэмсіл у Таліне.
Цакхна па выніках сустрэчы адзначыў на сваёй старонцы ў сацсетцы Х, што “намаганні павінны працягвацца датуль, пакуль усе палітычныя зняволеныя ў Беларусі не будуць вызваленыя”.
