КР пра вызваленне групы палітвязняў: Крок, які дае надзею, але ў турмах застаюцца сотні невінаватых людзей
21 чэрвеня, Позірк. “Крокам, які дае надзею”, назвала вызваленне 21 чэрвеня групы палітвязняў Каардынацыйная рада (КР).
“Але ме памятаем: у турмах па-ранейшаму застаюцца сотні нявінных людзей (паводле даных праваабарончага цэнтра “Вясна”, статус палітвязня зараз мае 1.186 чалавек, агульная колькасць асуджаных з палітычных матываў невядомая. — “Позірк”.), чыя віна толькі ў тым, што яны хацелі праўды і свабоды”, — адзначыла палітычная структура.
КР, як заяўлена, “працягне змагацца за вызваленне кожнага палітвязня”.
“Значным крокам, які ўсяляе надзею” таксама назвала тое, што адбылося, член фракцыі “Беларусы” ў КР, сузаснавальнік Асацыяцыі сваякоў і былых палітвязняў Таццяна Хоміч (сястра асуджанай з палітычных матываў Марыі Калеснікавай — прадстаўніцы штаба экс-прэтэндэнта на пасаду прэзідэнта Віктара Бабарыкі і паплечніцы Святланы Ціханоўскай).
“Я ўдзячная Злучаным Штатам за настойлівую, паслядоўную працу і гатоўнасць дамагацца паступовага прагрэсу там, дзе раней здавалася, што нічога не зменіцца, — напісала яна на сваёй старонцы ў “Інстаграме”. — Дзякую таксама афіцыйнаму Мінску за канструктыўны жэст. Мы ўсе чакалі гэтага і спадзяёмся на працяг”.
Паводле слоў Хоміч, “размаўляць трэба не пасля, а дзеля вызвалення”. “Гэтыя змяненні сталі магчымыя дзякуючы перамовам. Яны наглядна паказалі, што менавіта дыялог здольны прыносіць рэальныя, чалавечыя вынікі”, — падкрэсліла яна.
“Доўгі час пераважала рыторыка, згодна з якой размовы дапушчальныя толькі пасля вызвалення ўсіх. Але, нягледзячы на шчырую матывацыю — імкненне да справядлівасці, гэтая пазіцыя страціла рэалістычнасць у цяперашніх умовах. Заклікаю ўсе бакі працягваць рухацца па гэтым шляху — дзеля тых, хто дагэтуль за кратамі, і дзеля будучыні Беларусі”, — дадала сузаснавальнік асацыяцыі.
14 палітвязняў вызвалілі 21 чэрвеня пасля сустрэчы ў Мінску спецпрадстаўніка ЗША па пытаннях Украіны Кіта Келага і Аляксандра Лукашэнкі. Частка з іх знаходзіцца ў Вільнюсе.
Намеснік Келага Джон Коўл заявіў, што місію па вызваленні групы беларускіх палітвязняў “натхніў прэзідэнт [Дональд] Трамп”, падтрымку аказалі намеснік дзяржсакратара Крыс Лэндаў ды “іншыя прадстаўнікі адміністрацыі”.
На волю выйшлі муж беларускага дэмлідара Святланы Ціханоўскай відэаблогер Сяргей Ціханоўскі, актывіст анархісцкага руху Акіхіра Гаеўскі-Ханада, экс-супрацоўнік “Радыё Свабода” Ігар Карней, выкладчыца Наталля Дуліна, бізнесмен Сяргей Шэлег, удзельнік закрытага чата “Саюз беларускага нацыянальнага шчыта” Кірыл Балахонаў, а таксама Алан Ройё (грамадзянін Эстоніі), Юрыйс Ганінс і Дзмітрыйс Міхайлаўс (абодва — грамадзяне Латвіі), Галіна Краснянская (мае беларускае і шведскае грамадзянства). Імёны тых чацвярых, што засталіся, невядомыя, аднак трое з іх — грамадзяне Польшчы.
