Еўрапейскія палітыкі вітаюць вызваленне шэрагу беларускіх палітвязняў, але заклікаюць адпусціць усіх
21 чэрвеня, Позірк. Еўропа “працягвае заклікаць да неадкладнага вызвалення” ўсіх беларускіх палітвязняў, заявіла кіраўнік Еўракамісіі Урсула фон дэр Ляен, каментуючы выхад з месцаў несвабоды 14 вязняў, у тым ліку мужа дэмакратычнага лідара Святланы Ціханоўскай відэаблогера Сяргея Ціханоўскага.
“Дарагая Святлана Ціханоўская, гэта цудоўная навіна і магутны сімвал надзеі для ўсіх палітвязняў, якія пакутуюць пад прыгнётам жорсткага рэжыму [Аляксандра] Лукашэнкі”, — напісала яна на сваёй старонцы ў сацыяльнай сетцы Х.
Вярхоўны прадстаўнік Еўрасаюза па замежных справах і палітыцы бяспекі Кая Калас назвала вызваленне Ціханоўскага і яшчэ 13 палітычных палітвязняў “станоўчым крокам пасля працяглай несправядлівасці”. “Я вітаю ўдзел ЗША, які зрабіў гэта магчымым, і падзяляю радасць уз’яднаных сем’яў. Але ўсе палітычныя зняволеныя ў Беларусі павінны быць вызваленыя”, — падкрэсліла яна.
Прэм’ер-міністр Швецыі Ульф Крыстэрсан выказаў “вялікую падзяку прэзідэнту [ЗША Дональду] Трампу і яго прадстаўніку [па пытаннях Украіны Кіту] Келагу за перамовы, якія прывялі да вызвалення некалькіх палітзняволеных”, у ліку якіх “грамадзянка Швецыі Галіна Краснянская і муж Святланы Ціханоўскай Сяргей Ціханоўскі”. “Гэтае вызваленне падкрэслівае важнасць уцягнутасці ЗША ў нашым рэгіёне. Ціск на Беларусь мае працягвацца да тае пары, пакуль усе палітычныя вязні не будуць вызваленыя”, — заявіў кіраўнік шведскага ўрада.
Літоўскі міністр замежных спраў Кястуціс Будрыс адзначыў, што вызваленыя беларускія палітвязні цяпер “у бяспецы ў Літве і атрымліваюць неабходную дапамогу”. “Роля ЗША ў іх вызваленні была ключавой. Але гэта яшчэ не канец. Больш за 1.000 закладнікаў усё яшчэ застаецца ў беларускіх турмах. Усе яны маюць быць неадкладна вызваленыя”, — запатрабаваў чыноўнік.
Яго нямецкі калега Ёхан Вадэфуль назваў вызваленне Ціханоўскага “надзвычай добрай навіной”. “У той жа час мы не забываемся на мноства іншых зняволеных у Беларусі. Лукашэнка павінен неадкладна іх вызваліць”, — заявіў ён.
Кіраўнік МЗС Нідэрландаў Каспар Вальдкамп таксама лічыць выхад Ціханоўскага на свабоду “выдатнай навіной”. “Доўгачаканы момант для Святланы і іх сям’і. Удзячны за магутную падтрымку з боку ЗША і іншых партнёраў. У Беларусі ўсё яшчэ застаецца больш за 1.000 палітвязняў. Мы павінны працягваць дамагацца іх вызвалення”, — напісаў кіраўнік нідэрландскай дыпламатыі.
Бюро па дэмакратычных інстытутах і правах чалавека АБСЕ вітала вызваленне Ціханоўскага ды іншых людзей, якіх у Беларусі “несправядліва пазбавілі волі”. “Мы працягваем заклікаць да вызвалення ўсіх, хто застаецца за кратамі толькі за ажыццяўленне сваіх фундаментальных правоў на мірны пратэст і свабоду выказвання меркаванняў”, — падкрэсліў міжнародны інстытут.
Юлія Навальная, жонка памерлага ў калоніі (верагодна, забітага) расійскага апазіцыйнага лідара Аляксея Навальнага, выказала радасць ад таго, што “сёння стала на 14 палітвязняў менш”.
“Вялізная праца Святланы Ціханоўскай і яе каманды. Мае віншаванні ўсім сем’ям вызваленых палітвязняў. Святлану і Сяргея я хачу павіншаваць асобна. Гэта выдатная навіна”, — напісала яна.
14 палітвязняў вызвалілі 21 чэрвеня пасля сустрэчы ў Мінску спецпрадстаўніка ЗША па пытаннях Украіны Кіта Келлага і Аляксандра Лукашэнкі.
Апрача Ціханоўскага на волю выйшлі экс-супрацоўнік “Радыё Свабода” Ігар Карней, выкладчыца Наталля Дуліна, актывіст анархісцкага руху Акіхіра Гаеўскі-Ханада, уладальніца беларускага і шведскага грамадзянства Галіна Краснянская, бізнесмен Сяргей Шэлег, удзельнік закрытага чата “Саюз беларускага нацыянальнага шчыта” Кірыл Балахонаў, грамадзянін Эстоніі Алан Ройё, а таксама трое грамадзян Польшчы ды іншыя, чые імёны пакуль не называюцца.
Частка вызваленых знаходзіцца ў Вільнюсе.
Намеснік Келага Джон Коўл заявіў, што місію па вызваленні групы беларускіх палітвязняў “натхніў прэзідэнт [Дональд] Трамп”, падтрымку аказалі намеснік дзяржсакратара Крыс Лэндаў ды “іншыя прадстаўнікі адміністрацыі”.
Келаг прыехаў — Ціханоўскі на волі. "Вялікая ўгода" паміж Лукашэнкам і ЗША працуе?
Многія меркавалі: калі Аляксандр Лукашэнка і вызваліць Сяргея Ціханоўскага, то ў ліку апошніх палітычных вязняў. Таму што мае да яго асаблівую нянавісць, пачуццё помсты. Але вось сёння той выйшаў на волю. І яшчэ 13 палітзэкаў. Калі трэба, Лукашэнка можа пераступаць …
