МЗС Польшчы пацвердзіла вызваленне трох сваіх грамадзян з-за кратаў у Беларусі
21 чэрвеня, Позірк. У ліку 14 палітвязняў, вызваленых з беларускіх месцаў несвабоды, трое польскіх грамадзян, пацвердзіла ў апублікаваным 21 чэрвеня камюніке Міністэрства замежных спраў Польшчы.
Знешнепалітычнае ведамства адзначыла, што гэта грамадзяне, “за вызваленне якіх выступалі ўлады Рэспублікі Польшча“.
“Мы дзякуем Адміністрацыі прэзідэнта [ЗША] Дональда Трампа за прыкладзеныя намаганні, а таксама прэзідэнту Рэспублікі Польшча Анджэю Дудзе за нададзеную падтрымку. Мы спадзяемся, што візіт у Мінск пасланнікаў прэзідэнта ЗША — генерала Кіта Келага, Джона Коўла і Крыса Сміта — стане першым крокам да вызвалення наступных польскіх зняволеных, у тым ліку [журналіста і актывіста неафіцыйнага Саюза палякаў Беларусі] Анджэя Пачобута“, — адзначана ў камюніке.
Кіраўнік польскага МЗС Радаслаў Сікорскі павіншаваў Сяргея Ціханоўскага, які выйшаў на волю, — мужа беларускага дэмакратычнага лідара Святланы Ціханоўскай.
“Свабодны свет мае патрэбу ў табе, Сяргей! Ад усёй душы радыя за цябе, Святлана, і за ўсю тваю сям’ю. Бачыць вас разам зноў— найлепшае пацверджанне таго, дзеля чаго былі гэтыя гады барацьбы за свабоду. Мы будзем і далей дамагацца вызвалення астатніх, уключаючы Анджэя Пачобута“, — напісаў Сікорскі ў “Инстаграме”.
У лютым 2023 года Пачобут у рамках палітычна матываванай справы быў прыгавораны да 8 гадоў пазбаўлення волі. Польскія ўлады ўвесь час кажуць пра тое, што яго вызваленне з’яўляецца прыярытэтам і адной з умоў, якія Мінск павінен выканаць, калі жадае рухацца ў бок нармалізацыі стасункаў.
У сваю чаргу Аляксандр Лукашэнка неаднаразова галаслоўна абвінавачваў Варшаву ў тым, што яна “адмовілася ” ад Пачобута. 12 красавіка беларускі палітык фактычна адхіліў вылучаныя Польшчай патрабаванні, неабходныя для патэнцыйнага працэсу нармалізацыі стасункаў.
