Кантакты з Лукашэнкам павінны адбывацца толькі пасля спынення рэпрэсій — Латушка пра магчымы візіт Келага

18 чэрвеня, Позірк. Без пастаяннага ціску Аляксандр Лукашэнка не выканае ўмовы, неабходныя для таго, каб з ім можна было неяк кантактаваць, заявіў намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка, каментуючы інфармацыю пра магчымы візіт у Мінск спецпрадстаўніка ЗША па пытаннях Украіны Кіта Келага.

“Падчас нядаўніх сустрэч з памочнікам дзяржсакратара ЗША Крыстаферам Смітам і дыпламатамі амерыканскай амбасады ў Беларусі я падкрэсліваў, што любыя кантакты ў Беларусі, якія тычацца вайны і міру ва Украіне, павінны адбывацца толькі пры поўным прызнанні таго, што Лукашэнка з’яўляецца агрэсарам у гэтай вайне, — напісаў палітык на сваёй старонцы ў сацыяльнай сетцы Х. — І толькі пасля таго, як дыктатар вызваліць больш за 1.188 палітвязняў (паводле даных праваабарончага цэнтра “Вясна”), спыніць штодзённыя рэпрэсіі, распачне канкрэтныя крокі па дэкрыміналізацыі грамадска-палітычнага жыцця ў Беларусі, спыніць трансгранічны пераслед беларусаў і распачне дыялог з дэмакратычнай большасцю”.

Раней дырэктар Агенцтва еўраатлантычнай супрацы Валер Кавалеўскі выказаў меркаванне, што Келаг апрача тэмы вайны ва Украіне можа абмеркаваць з Лукашэнкам шэраг беларускіх пытанняў, у тым ліку вызваленне палітзняволеных у абмен на зняцце санкцый.

У сваю чаргу дарадца беларускага дэмлідара Святланы Ціханоўскай па канстытуцыйнай рэформе і парламенцкай супрацы Анатоль Лябедзька мяркуе, што сцэнарый магчымай сустрэчы Лукашэнкі і Келага будзе ўзгадняцца ў Крамлі.

Пра тое, што Келаг “найбліжэйшымі днямі накіруецца” ў Беларусь на сустрэчу з Лукашэнкам 18 чэрвеня паведаміла міжнароднае інфармагенцтва Reuters са спасылкай на ўласныя крыніцы. Дакладны парадак сустрэчы пакуль незразумелы, хоць Келаг, паводле інфармацыі крыніц, у прыватным парадку ахарактарызаваў паездку як “крок, які можа дапамагчы распачаць мірныя перамовы, скіраваныя на спыненне вайны Расіі супраць Украіны”.

Дзярждэпартамент і амбасада Беларусі ў ЗША адмовіліся каментаваць інфармацыю, якая з’явілася, у той час як Белы дом і сам Келаг на адпаведны запыт Reuters пакуль не адказалі.

Разам з тым, адзначае агенцтва, планаванне такіх паездак “патрабуе дбайных перамоў”, таму “не выключана, што паездка можа быць скасаваная або змененая ў апошні момант”.

На мінулым тыдні стала вядома, што прэзідэнт ЗША Дональд Трамп падоўжыў на чарговы год, пачынаючы з 16 чэрвеня, дзеянне нацыянальнага рэжыму надзвычайнай сітуацыі ў дачыненні да Беларусі.

У адпаведным апавяшчэнні адзначаецца, што “дзеянні і палітыка некаторых членаў урада Беларусі і іншых асоб, а таксама згубная дзейнасць і шматгадовыя злоўжыванні беларускага рэжыму працягваюць уяўляць незвычайную і надзвычайную пагрозу для нацыянальнай бяспекі і знешняй палітыкі Злучаных Штатаў”.