Сцэнарый магчымай сустрэчы Лукашэнкі і Келага будзе ўзгадняцца ў Крамлі, лічыць Лябедзька

18 чэрвеня, Позірк. Навіна пра магчымы візіт у Беларусь спецыяльнага прадстаўніка ЗША па пытаннях Украіны Кіта Келага “дазваляе запусціць інфармацыйна-прапагандысцкія рэсурсы, каб надзьмуць здзмутую фігуру беларускага кіраўніка”, такое меркаванне выказаў у “Парламенцкім канале” дарадца Святланы Ціханоўскай па канстытуцыйнай рэформе і парламенцкай супрацы Анатоль Лябедзька.

“Лукашэнка паспрабуе здавацца самастойным у публічнай прасторы, — мяркуе палітык. — У рэчаіснасці, сцэнарый яго магчымай сустрэчы з Келлагам будзе ўзгадняцца і візавацца ў Крамлі”.

“Так, хутчэй за ўсё Лукашэнка паспрабуе рэанімаваць Беларусь як пляцоўку для перагавораў па Украіне. Ніякіх перспектыў, але як корм для мясцовага спажыўца цалкам сыдзе”, — адзначыў ён.

Лябедзька не выключае, што “Келаг павязе з самой некага з палітвязняў”, і гэта “магло б стаць самым значным вынікам паездкі спецпасланніка ў Мінск”.

“А для Чырвонага дома (Адміністрацыі прэзідэнта. — “Позірк”.), галоўны вынік — стварэнне адчування суб’ектнасці, якая вяртаецца”, — падсумаваў дарадца Ціханоўскай.

Раней дырэктар Агенцтва еўраатлантычнай супрацы Валер Кавалеўскі выказаў меркаванне, што Келаг апрача тэмы вайны ва Украіне можа абмеркаваць з Лукашэнкам шэраг беларускіх пытанняў, у тым ліку вызваленне палітзняволеных у абмен на зняцце санкцый.

Пра тое, што Келаг “найбліжэйшымі днямі накіруецца” ў Беларусь на сустрэчу з Лукашэнкам 18 чэрвеня паведаміла міжнароднае інфармагенцтва Reuters са спасылкай на ўласныя крыніцы. Дакладны парадак сустрэчы пакуль незразумелы, хоць Келаг, паводле інфармацыі крыніц, у прыватным парадку ахарактарызаваў паездку як “крок, які можа дапамагчы распачаць мірныя перамовы, скіраваныя на спыненне вайны Расіі супраць Украіны”.

Дзярждэпартамент і амбасада Беларусі інфармацыю, што з’явілася, пакуль не каментавалі.

Разам з тым, адзначае Reuters, планаванне такіх паездак “патрабуе дбайных перамоў”, таму “не выключана, што паездка можа быць скасаваная або змененая ў апошні момант”.