Беларусь і Азербайджан маюць намер пашырыць вайсковую супрацу

17 чэрвеня, Позірк. Пашырэнне вайсковай супрацы абмеркавалі на перагаворах 17 чэрвеня ў Мінску міністр абароны Віктар Хрэнін і яго азербайджанскі калега Закір Гасанаў, вынікае з інфармацыі прэс-службы беларускага ваеннага ведамства.

Адзначаецца, што бакі “абмеркавалі цяперашні стан двухбаковай вайсковай супрацы і намецілі шляхі яе інтэнсіфікацыі ў галінах, якія прадстаўляюць узаемны інтарэс”.

“Мы не маем праблем ні ў стасунках, ані ва ўзаемаразуменні, — заявіў Хрэнін. — Нам трэба толькі правесці рэвізію па асноўных напрамках супрацы. <…> Супраца паміж Беларуссю і Азербайджанам мае адкрыты характар ​​і адрозніваецца высокім узроўнем рознабаковага дыялога. Яго фундаментам з’яўляюцца брацкія сувязі паміж нашымі народамі”.

“У чарговы раз хачу падкрэсліць высокі ўзровень нашых двухбаковых стасункаў у вайсковай сферы, а галоўнае — існую ўзаемную зацікаўленасць ды патэнцыял для іх далейшага паглыблення”, — дадаў ён.

У сваю чаргу Гасанаў, як сцвярджае прэс-служба Мінабароны Беларусі, адзначыў, што Баку “высока цэніць вайсковую і вайскова-тэхнічную супрацу” з Беларуссю і нацэлены “на яго паглыбленне”. “Абмен дэлегацыямі — гэта не толькі абмен досведам, але і збліжэнне нашых краін”, — падкрэсліў азербайджанскі военачальнік.

Варта адзначыць, што супраца Мінска і Баку ў вайсковай сферы абвастрыла стасункі Беларусі з яе фармальнай саюзніцай па Арганізацыі Дагавора аб калектыўнай бяспецы — Арменіяй, якая фактычна варагуе з Азербайджанам.

22 траўня 2024 года армянскі прэм’ер-міністр Нікол Пашынян заявіў у парламенце: “У падрыхтоўцы 44-дзённай вайны 2020 года ўдзельнічалі не з нашага боку нашыя саюзнікі. Я ведаю як мінімум дзве краіны — члены АДКБ, якія ўдзельнічалі ў падрыхтоўцы вайны супраць нас. Гэтыя краіны, магчыма, стваралі імітацыю дапамогі нам”. Паводле яго слоў, вайна з Азербайджанам была “не з-за Нагорнага Карабаха”, а “пра тое, каб Арменія нічога з сябе не прадстаўляла”, яе мэтай было “спыненне існавання Арменіі”.

Кіраўнік армянскага ўрада не ўдакладніў, якія краіны мае на ўвазе, але мімаходзь згадаў у сваёй прамове Аляксандра Лукашэнку.

Апошні пасля карабахскіх падзей актывізаваў кантакты з Баку, не хаваючы задавальнення тым, што Азербайджан заняў спрэчны рэгіён, і прапануючы дапамогу ў яго ўладкаванні.