Мінабароны Беларусі акрэдытавала новага вайсковага аташэ пры амбасадзе Індыі
Вайсковы аташэ Індыі Аджай Пундзір Сінгх
16 чэрвеня, Позірк. У Беларусі акрэдытаваны новы вайсковы аташэ Індыі — брыгадны генерал Аджай Пундзір Сінгх, вынікае з паведамлення, апублікаванага 16 чэрвеня беларускім Міністэрствам абароны.
Адзначаецца, што Пундзір Сінгх з’яўляецца аташэ пры амбасадзе ў Расіі і Беларусі па сумяшчальніцтве.
На акрэдытацыйнай сустрэчы начальнік дэпартамента міжнароднай вайсковай супрацы (МВС) — памочнік міністра абароны па пытаннях МВС Валерый Равенка абмеркаваў з індыйскім вайсковым аташэ “стан і перспектывы развіцця як шматбаковай — у фармаце Шанхайскай арганізацыі супрацоўніцтва, так і двухбаковай вайсковай супрацы Рэспублікі Беларусь і Рэспублікі Індыя”.
“Бакі таксама абмяняліся думкамі па пытаннях міжнароднай і рэгіянальнай бяспекі. Акцэнтаваная ўвага на неабходнасць больш шчыльнага ўзаемадзеяння па напрамках, якія прадстаўляюць узаемны інтарэс”, — паведаміла Мінабароны.
Раней вайсковым аташэ Індыі ў Беларусі па сумяшчальніцтве быў брыгадны генерал Навін Ніджхаван.
У кастрычніку 2024 года Равенка абмяркоўваў з Ніджхаванам перспектывы працы на 2025-й.
Аляксандр Лукашэнка, прызначаючы летась 4 студзеня экс-старшыню канцэрна “Беллеспаперапрам” Міхаіла Касько амбасадарам у Індыі, заявіў, што стасункі паміж краінамі дэградавалі.
Пра “рашучасць вывесці двухбаковы дыялог” з Нью-Дэлі на “ўзровень стратэгічнага партнёрства” Лукашэнка заяўляў 10 чэрвеня 2024 года, віншуючы прэм’ер-міністра Індыі Нарэндру Модзі з перамогай на парламенцкіх выбарах.
Палітык неаднаразова запрашаў Модзі і прэзідэнта Індыі Драўпадзі Мурму наведаць Беларусь для абмеркавання двухбаковых стасункаў.
