20-гадовага жыхара Мінска абвінавачваюць у “рэабілітацыі нацызму”, сілавікі таксама сцвярджаюць, што ён хацеў ваяваць у ПКК

10 чэрвеня, Позірк. Упраўленне Следчага камітэта па Мінску выставіла 20-гадоваму жыхару сталіцы абвінавачанне паводле ч. 1 арт. 130¹ КК (рэабілітацыя нацызму).

Малады чалавек узяты пад варту. “Канчатковая прававая ацэнка дзейнасці” фігуранта справы “будзе дадзеная пасля завяршэння расследавання”, паведаміла прэс-служба сталічнай пракуратуры.

Наглядны орган заявіў, што мінчанін са старэйшых класаў “захапляўся гісторыяй”, “пераважна яго цікавіў погляд на Другую сусветную вайну вачыма прадстаўнікоў Трэцяга рэйха, у сувязі чым ён шукаў адпаведныя тэматычныя супольнасці”.

“Вывучыўшы [у адной з груп сацсеткі “УКантакце”] апублікаваную інфармацыю, мінчанін прыйшоў да высновы, што яму блізкая фашысцкая ідэалогія і тэорыя перавагі так званай арыйскай расы над ніжэйшымі пластамі насельніцтва, — сцвярджае пракуратура Мінска. — Хлопец шчыра прыйшоў да высновы, што нацысты прыйшлі на беларускія землі не з мэтай акупацыі, а для “выратавання” народа ад савецкага ўрада і стварэння “Новай Еўропы” на чале з фюрэрам”.

Малады чалавек, як заяўлена, не толькі “распаўсюджваў відэаролікі, у якіх Гітлер паказваўся як выратавальнік Еўропы і стваральнік грамадства будучыні”, але і “трансляваў іх пры зносінах з сябрамі і блізкімі”.

Акрамя таго, абвінавачаны сёлета ўвесну, як сцвярджае наглядны орган, “вырашыў уступіць” у беларускі полк Кастуся Каліноўскага, які ваюе на баку Украіны. Гэта падраздзяленне рэжым Аляксандра Лукашэнкі лічыць “тэрарыстычнай арганізацыяй”, якая нібыта збіраецца ўварвацца ў Беларусь “для правакацыі ўзброеных канфліктаў з сілавымі структурамі і арміяй краіны”, а таксама “гвалтоўна змяніць канстытуцыйны лад, незаконна захапіць уладу і ліквідаваць грамадзян, якія не падтрымліваюць іх погляды”.

“Высветлена, што фігурант перадаў фатаграфію пашпартных даных у чат-бот тэрарыстаў і выказаў гатоўнасць да ўдзелу ў баявых дзеяннях. Заяўка была прынятая, аднак яго планы спынілі супрацоўнікі ГУБАЗіК МУС”, — гаворыцца ў паведамленні.

У 2021 годзе быў прыняты закон “Аб генацыдзе беларускага народа”. Пад беларускім народам у кантэксце дакумента “разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

За “адмаўленне генацыду беларускага народа” арт. 130² КК прадугледжвае адказнасць у выглядзе 5 гадоў зняволення, за паўторнае парушэнне закона — ад 3 да 10 гадоў пазбаўлення волі.

Незалежныя гісторыкі і эксперты лічаць, што ўлады выкарыстоўваюць гэтую тэму для дыскрэдытацыі апанентаў. Пра гэта, у прыватнасці, сведчыць змест кнігі “Генацыд беларускага народа”, якая выйшла пад рэдакцыяй генеральнага пракурора Андрэя Шведа. У ёй сцвярджаецца, што масавыя пратэсты супраць фальсіфікацыі вынікаў прэзідэнцкіх выбараў 2020 года з’яўляюцца спробай дзяржаўнага перавароту з выкарыстаннем нацысцкай ідэалогіі. Акрамя таго, да генацыду фактычна прыраўнаваны антысавецкі супраціў у першыя пасляваенныя гады.