30 траўня, Позірк. Масква і Мінск скарацілі маштабы сумесных ваенных вучэнняў “Захад-2025”, верагодна, каб стварыць “бачнасць супрацоўніцтва” і адцягнуць увагу ад абмежаванага ваеннага патэнцыялу Расіі па-за межамі ўкраінскага тэатра ваенных дзеянняў. Да такой высновы прыйшлі аналітыкі амерыканскага Інстытута вывучэння вайны (ISW).
Паводле іх меркавання, “Расія і Беларусь спрабуюць пазіцыянаваць сябе як непагражаючыя, разумныя і гатовыя да супрацоўніцтва з Захадам”. Пры гэтым у ISW лічаць, што ім давялося скараціць маштабы вучэнняў, паколькі многія з іх патэнцыйных удзельнікаў цяпер ваююць ва Украіне.
У абгрунтаванне тэзы ў матэрыяле прыводзяцца назвы канкрэтных расійскіх вайсковых падраздзяленняў, што прымалі ўдзел у вучэннях “Захад-2021”, значныя часткі якіх у цяперашні час удзельнічаюць у вайне ва Украіне. Таксама аналітыкі нагадваюць, што “расійскія афіцыйныя асобы нечакана адмянілі вучэнні “Захад-2023″ праз патрэбу Расіі ў тэхніцы і жывой сіле для вайны ва Украіне”.
Міністр абароны Беларусі Віктар Хрэнін 28 траўня на пасяджэнні Савета міністраў абароны краін АДКБ заявіў пра “зніжэнне параметраў” запланаваных на цяперашні верасень беларуска-расійскіх ваенных вучэнняў “Захад-2025” і перанос манеўраў ад межаў углыб Беларусі.
Аўтарызавацца
Забыліся пароль?
Выхад з профілю
