Затрымана больш за 20 рэйсаў “Белавія” — прылёты і вылеты ў аэрапорт Мінск праходзяць са спазненнем да шасці гадзін

28 мая, Позірк. Не менш за 26 рэйсаў нацыянальнай авіякампаніі “Белавія“ затрымана 28 мая, вынікае з праведзенага “Позіркам“ аналізу даных аэрапорта Мінск.

Са спазненнем (да двух з паловай гадзін) ажыццяўляюцца вылеты 14 рэйсаў: шэсць у Маскву (тры — у Шарамеццева, два — ва Унукава, адзін — у Дамадзедава); тры — у Санкт-Пецярбург; два — у турэцкія Анталлю і Стамбул; па адным — у расійскія Казань, Калінінград і Наябрск.

Затрымалі прылёт (да шасці гадзін) 12 рэйсаў: чатыры з Масквы (два — з Шарамеццева, па адным — з унукаў і Дамадзедава); два з Турцыі (Анталлі, і Стамбула); па адным — з расійскіх Казані, Калінінграда і Санкт-Пецярбурга, а таксама Баку (Азербайджан), Ташкента (Узбекістан) і Хургады (Егіпет).

Са спазненнем прыбываюць у Мінск і вылятаюць некаторыя рэйсы расійскіх авіякампаній “Аэрофлот“ і “Победа“.

“Белавія” некалькімі гадзінамі раней папярэдзіла аб магчымай змене часу вылету і прылёту рэйсаў. Прэс-служба перавозчыка распаўсюдзіла адпаведнае паведамленне на фоне таго, што маскоўскія Аэрапорты ў ноч на 28 траўня ўводзілі абмежаванні на палёты.

У паведамленні нагадваецца, што “пры затрымцы або скасаванні рэйсаў з прычын, якія не залежаць ад авіякампаніі, “Белавія“прапануе пасажырам альбо бясплатнае пераафармленне білета на альтэрнатыўны рэйс, альбо поўнае вяртанне яго кошту”.

Расійскія аэрапорты перыядычна прыпыняюць працу па прыёме і адпраўцы рэйсаў. Такія абмежаванні ўводзяцца, як правіла, праз пагрозу атакі ўкраінскіх беспілотнікаў.