Прэзідэнт Украіны Зяленскі назваў немагчымым правядзенне перагавораў з РФ у Беларусі

28 траўня, Позірк. Украінскі прэзідэнт Уладзімір Зяленскі назваў немагчымым правядзенне перагавораў з Расіяй у Беларусі, вынікае з паведамлення інфармагенцтва “Інтэрфакс-Украіна”.

Палітык заявіў журналістам 27 траўня, што Украіна разглядае ў якасці пляцовак для магчымых перагавораў па спыненні вайны Турцыю, Ватыкан і Швейцарыю. Ватыканскую пляцоўку, паводле яго слоў, “падтрымліваюць усе, акрамя расійскага боку”.

“Усе перадалі сігналы пра гатоўнасць да наступных сустрэч. І Швейцарыя. Вельмі хоча швейцарскі бок, мы не супраць. Зноў-такі, усе мы падтрымліваем. Ад расіян сігналаў не чулі”, — заявіў Зяленскі.

Прэзідэнт Украіны адзначыў, што свае пляцоўкі для перагавораў прапануюць Мальта і краіны Афрыкі, але Расія “на ўвесь гэты спектр перадала сігнал па Беларусі”.

“Як вам сказаць, да чаго гэта падобна? Калі не хочуць, мне здаецца, людзі мусяць сказаць: “Мы зараз не гатовыя. Або не хочам заканчваць вайну”. Бо гэта несур’ёзна. Беларусь для нас на сёння з’яўляецца краінай, з якой паляцелі ракеты, і, адпаведна, яна з’яўляецца саюзнікам краіны, якая на нас напала. І войскі заходзілі з Беларусі. Гэта проста немагчыма ў дачыненні да Беларусі”, — канстатаваў кіраўнік украінскай дзяржавы.

Аляксандр Лукашэнка і прадстаўнікі яго рэжыму неаднаразова заяўлялі, што могуць прыняць у сябе перагаворныя дэлегацыі Украіны і РФ. Пры гэтым сваю ролю яны ацэньваюць супярэчліва, то выказваючы гатоўнасць стаць пасярэднікам, то катэгарычна ад гэтага адмаўляючыся.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль. Нягледзячы на ​​тое, што беларуская тэрыторыя і інфраструктура выкарыстоўваліся для нападу, некалькі раундаў перагавораў паміж Масквой і Кіевам на пачатку вайны прайшлі менавіта ў Беларусі.

Пазней прадстаўнікі рэжыму ў Мінску неаднаразова заяўлялі, што Беларусь мусіць быць прадстаўленая на мірных перагаворах паміж РФ і Украінай.