Мінінфарм хоча абменьвацца спісамі “экстрэмісцкай літаратуры” з РФ

26 траўня, Позірк. Абменьвацца спісамі “экстрэмісцкай літаратуры” прапанаваў Расіі намеснік міністра інфармацыі Беларусі Дзяніс Язерскі на ХХ Санкт-Пецярбургскім міжнародным кніжным салоне 26 траўня, паведамляе прэс-служба ведамства.

Паводле яго, “зацікаўленасць тут павінна быць узаемнай, а супрацоўніцтва самым цесным“ у барацьбе з “продажам кніг, якія могуць негатыўна ўплываць на чытачоў”.

“Разам мы павінны яшчэ больш і больш цесна працаваць у пытаннях процідзеяння нашым ідэйным апанентам з мэтай недапушчэння рэалізацыі выданняў, у змесце якіх маюцца элементы дэструктыўнага маральна-псіхалагічнага і культурнага ўздзеяння на грамадства, перш за ўсё дзяцей і моладзь“, — сказаў чыноўнік.

Паводле яго сцвярджэння, у краіну нярэдка паступаюць перакладныя кнігі ад расійскіх выдавецтваў, змест якіх “не адпавядае рэалізуемым задачам у сферы духоўна-маральнага развіцця грамадства“ Беларусі і РФ.

Аб масавым паступленні з Расіі “вялікай колькасці літаратуры”, якая “можа быць аднесеная да экстрэмісцкай“, заявіў у лістападзе мінулага года міністр інфармацыі Марат Маркаў: “[Такая літаратура] проста супярэчыць нашым нацыянальным інтарэсам”.

15 траўня ў сувязі з крымінальнай справай у Расіі супраць супрацоўнікаў выдавецтва “Эксмо“ па справе аб “экстрэмізме“, Міністэрства інфармацыі Беларусі запатрабавала ад распаўсюджвальнікаў кніг “правесці рэвізію друкаваных выданняў, якія рэалізуюцца”.

Цяпер у спісе забароненых кніг у Беларусі больш за 90 пазіцый, таксама некаторыя кнігі знаходзяцца ў спісе “экстрэмісцкіх матэрыялаў“, які ўвесь час папаўняецца.

Да “шкодных” Мінінфарм афіцыйна адносіць “друкаваныя выданні, якія скажаюць гістарычную праўду і справядлівасць, прапагандуюць нетрадыцыйныя сэксуальныя адносіны, рэлігійную нецярпімасць, гвалт, жорсткасць і парнаграфію, якія распальваюць варожасць і нянавісць, папулярызуюць нетрадыцыйныя для беларускага грамадства субкультуры, а таксама выданні аб палавым выхаванні дзяцей, здольныя аказаць негатыўны ўплыў на іх фізічнае і псіхічнае развіццё, сказіць уяўленне аб сапраўдных сямейных каштоўнасцях“.