У Бенгазі адкрыўся Дом Беларусі, лівійскаму боку падораны аўтобусы МАЗ

25 траўня, Позірк. Аб цырымоніі адкрыцця Дома Беларусі, якая адбылася ў Бенгазі (усходняя частка Лівіі), паведамляе прэс-служба ўрада.

Паводле слоў віцэ прэм’ера Віктара Каранкевіча, які ўдзельнічаў у цырымоніі, аб’ект стане “месцам прыцягнення суб’ектаў гаспадарання, бізнес-колаў, дзе будзе магчымасць правядзення сустрэч, абмеркавання канкрэтных кантрактаў і іх заключэння”.

“Прамысловасць, сельская гаспадарка, ахова здароўя, — удакладніў чыноўнік. — Бакі маюць намер развіваць супрацоўніцтва па многіх напрамках. Паглыбіць супрацоўніцтва дамовіліся і па лініі парламентаў”.

Адзначаецца, што беларуская дэлегацыя азнаёмілася ў Бенгазі з “лівійскімі аб’ектамі аховы здароўя”, лівійскі бок “максімальна зацікаўлены ў супрацоўніцтве — ад падрыхтоўкі кадраў да пастаўкі лекаў”.

“Лівійскаму боку былі падораны аўтобусы МАЗ, якія ўжо прыбылі ў пункт прызначэння і гатовыя да выкарыстання. Калі яны добра сябе зарэкамендуюць, быць можа, па вуліцах Бенгазі будзе курсіраваць яшчэ больш беларускай тэхнікі”, — сказаў Каранкевіч.

Беларускія аўтобусы рэгулярна загараюцца ў РФ і Беларусі, прычынай гэтага называюцца санкцыі, уведзеныя супраць прадпрыемства МАЗ.

Аб працоўным візіце ва ўсходнюю частку Лівіі дэлегацыі на чале з Каранкевічам паведамлялася 24 траўня.

“Плануецца абмеркаванне развіцця ў эканамічнай, гуманітарнай, сацыяльнай сферах, а таксама актывізацыя ўзаемадзеяння паміж парламентамі дзвюх краін, — заявіў віцэ-прэм’ер. — Прадугледжваюцца сустрэчы, каб падвесці папярэднія ўжо вынікі дзейнасці, а таксама актывізаваць працу па асноўных кірунках, а таксама актывізаваць пра па асноўных кірунках, якія дазволяць у цэлым забяспечыць безумоўнае выкананне дамоўленасцей, дасягнутых на ўзроўні кіраўніка нашай дзяржавы — паважанага Аляксандра Рыгоравіча Лукашэнкі — і фельдмаршала Лівіі спадара Хафтара”.

Вярхоўны галоўнакамандуючы Лівійскай нацыянальнай арміі (ЛНА) Халіфа Хафтар наведваў Мінск у лютым 2025 года. Лукашэнка на сустрэчы з ім заявіў, што беларускія ўлады гатовыя “зрабіць усё”, што прадстаўнікі Лівіі “ўбачаць карыснага ў Беларусі”.

Дэлегацыя Беларусі на чале з Каранкевічам наведвала Бенгазі ў сакавіку. Тады візіцёры прэзентавалі “магчымасці беларускай нафтаперапрацоўкі”, абмеркавалі супрацу ў галіне геолагаразведкі ды інш.

Дэ-юрэ Лівія — адзіная дзяржава, але дэ-факта пасля звяржэння Муамара Кадафі ў 2011 годзе краіна апынулася падзеленай і цяпер кіруецца некалькімі цэнтрамі ўлады.

ААН і міжнародная супольнасць прызнае ўрад нацыянальнага адзінства (УНА) на чале з прэм’ер-міністрам Абдэлем Хамідам Дбэйбам, які кантралюе каля траціны Лівіі — сталіцу Трыпалі і прылеглыя тэрыторыі (заходняя частка дзяржавы).

Каля дзвюх трацін краіны знаходзіцца пад кантролем усходняга ўрада Усамы Хамада, які базуецца ў Бенгазі, Палаты прадстаўнікоў у Табруку, якая яго прызначыла, і ЛНА на чале з Хафтарам, што іх падтрымлівае. Акрамя Беларусі цэнтр улады ва ўсходняй частцы Лівіі падтрымлівае Расія, Егіпет, ААЭ ды інш.

Нягледзячы на ​​тое, што УНА мае большую вагу на міжнароднай арэне, ва ўсходняга ўрада больш уплыву ўнутры краіны, у тым ліку дзякуючы кантролю над рэсурсамі і войскам.