Прызначэнне маркотнага Караніка можа быць метафарай, якая адлюстроўвае стан Акадэміі навук — навукоўца
Сяргей Бесараб
22 траўня, Позірк. Вызвалены 22 траўня ад пасады кіраўніка Нацыянальнай акадэміі навук (НАН) Уладзімір Гусакоў быў генератарам “смешнага крынжа”, навуковым “стэндаперам”, і людзям такое падабалася. Прызначаны жа на яго месца Уладзімір Каранік — “абсалютная маркота”, але гэтае прызначэнне можа быць і “метафарай, якая адлюстроўвае сучасны стан акадэміі”. Такую думку ў каментары “Позірку” выказаў беларускі навукоўца, былы супрацоўнік НАН Сяргей Бесараб.
“Гусакоў сапраўды вельмі стагнаваў, — перакананы суразмоўца. — Але з іншага боку — ён такі вельмі малаадукаваны аграрый, просты аграрны хлопец, які дарос да “міністра навукі” і як мог, так і цягнуў гэтую лямку. То бок зараз ад гэтай навіны заходзіцца ў слязах усё аграрнае аддзяленне Акадэміі навук. Бо пакуль быў Гусакоў, яны атрымоўвалі велізарныя грошы, прытым абсалютна на нейкія “крынжовыя”, вар’яцкія праекты, то бок яны фінансаваліся слепа”.
На думку Бесараба, таксама “плачуць” сваякі Гусакова, якіх ён “вельмі шчодра рассоўваў у кіраўніцтва розных інстытутаў”. (Напрыклад, сыны Уладзіміра Гусакова Гардзей Гусакоў і Ягор Гусакоў узначальваюць адпаведна Інстытут мяса-малочнай прамысловасці і Інстытут сістэмных даследаванняў у АПК НАН. — “Позірк”.).
“Гусакоў вядомы вечным змаганнем з электрамабілем, лінгвістычнымі практыкаваннямі наконт беларускага “двухмоўя”. Вельмі шмат увагі надзяляў казкам, народнаму фальклору, гэта было яго асноўнае хобі, аб чым добра ведаюць адпаведныя інстытуты НАН”, — дадаў навуковец.
“Што тычыцца Караніка, то, калі быць шчырым, ён ніякага дачынення да акадэмічнай суполкі не мае ў прынцыпе. Нават да сваёй, медыцынскай навукі, ён мае вельмі ўскоснае дачыненне, хаця з’яўляецца кандыдатам медыцынскіх навук, працаваў у Рэспубліканскім навукова-практычным цэнтры анкалогіі і медыцынскай радыялогіі. Але, як казалі яго калегі ў тым жа цэнтры, гэта абсалютна “шэры чалавек”, у яго няма сур’ёзных навуковых артыкулаў, патэнтаў. Звычайны малады доктар мае больш акадэмічных адзнак, чым Каранік”, — адзначыў Бесараб.
“То бок, — працягнуў ён, — акадэмічна Каранік — абсалютна нязначная фігура, гэта будзе такі вясельны, ці навукова-вясельны генерал”.
22 траўня Аляксандр Лукашэнка прызначыў Уладзіміра Караніка, які менш трох месяцаў (з 3 сакавіка) працаваў намеснікам прэм’ер-міністра, старшынёй прэзідыума Нацыянальнай акадэміі навук. На гэтай пасадзе чыноўнік змяніў Уладзіміра Гусакова, які ўзначальваў НАН з кастрычніка 2013 года.
