Шэсць краін экспануюць сваю зброю і тэхніку на выставе MILEX у Мінску
21 траўня, Позірк. Шэсць краін экспануюць сваё ўзбраенне і вайсковую тэхніку на выставе MILEX-2025, якая праходзіць 21–24 траўня ў Мінскім міжнародным выставачным цэнтры.
Паводле інфармацыі Міністэрства абароны, апрача Беларусі ў ліку экспанентаў Індыя, Іран, Кітай, Пакістан і Расія.
“У выставе бяруць удзел больш за 90 арганізацый абароннага сектара эканомікі. Сярод экспанентаў больш за 150 кампаній з Беларусі і пяці краін свету. <…> Колькасць кампаній у паўтара раза большая, чым была ў 2023 годзе”, — гаворыцца ў паведамленні.
Ведамства адзначыла, што на выставе прадстаўлена “больш за 750 узораў узбраення, вайсковай і спецыяльнай тэхнікі беларускай вытворчасці”. У іх ліку, як сцвярджаецца, “самыя новыя, перадавыя распрацоўкі айчыннага вайскова-прамысловага комплексу: “Зенітны ракетны комплекс “Бук-МБ-2К” з першай айчыннай зенітнай кіраванай ракетай, гранатамётны комплекс “Сапфір”, бронетранспарцёр V-2 ды іншыя навінкі”.
“Адной са значных падзей стане 11-я Міжнародная навуковая канферэнцыя па пытаннях развіцця ўзбраення, вайсковай і спецыяльнай тэхнікі і тэхналогій падвойнага прызначэння. У ёй на пяці секцыйных пасяджэннях возьмуць удзел каля 300 міжнародных экспертаў і спецыялістаў ВПК, якімі будзе прадстаўлена больш за 50 дакладаў па розных напрамках і аспектах развіцця вайскова-прамысловага комплексу”, — заяўляе Міністэрства абароны.
