20 траўня, Позірк. Цэнтр TLScontact — афіцыйны пастаўшчык паслуг для падачы заявы на візу ў Італію — да канца ліпеня гэтага года прыпыніў прыём запытаў на верыфікацыю праз вялікі аб’ём апрацоўкі.
На сайце цэнтра адзначана, што заяўнікаў, якія накіравалі запыты да 20 траўня, просяць “чакаць чаргі на правядзенне верыфікацыі і не накіроўваць дубляваных паведамленняў”. TLScontact падкрэсліў, што ў выпадку няяўкі “на прызначаны відэазванок апрацоўка запыту спыняецца”.
Дыпламатычныя стасункі паміж Беларуссю і Італіяй усталяваныя ў 1992 годзе. Тады ж у Мінску была адкрытая італьянская амбасада. У 1993 годзе ў Рыме пачало працаваць генеральнае консульства Беларусі.
Верыфікацыя — афіцыйны зварот консульства або візавага цэнтра ў кампетэнтныя органы (часцей за ўсё ў краіне знаходжання або краіне прызначэння) з мэтай пацвердзіць дакладнасць прадстаўленых заяўнікам даных або дакументаў.
