За выходныя Літва затрымала 24 партыі кантрабандных беларускіх цыгарэт — усяго 30 тыс. пачкаў

19 траўня, Позірк. 17 і 18 траўня ў Літве перахоплена 24 партыі кантрабандных цыгарэт беларускіх цыгарэт, паведамляе Служба аховы дзяржаўнай мяжы гэтай краіны (САДМ).

Кантрабанда перамяшчалася на літоўскую тэрыторыю на паветраных шарах з прымацаванымі да іх GPS-трэкерамі, усяго канфіскавана 30 тыс. пачкаў цыгарэт.

Паведамляецца аб затрыманні трох чалавек, якіх падазраюць у датычнасці да транспартавання цыгарэт. Пасля допыту яны былі вызваленыя з абавязацельствам з’явіцца па позве для правядзення далейшых следчых дзеянняў.

На думку ведамства, узрослая актыўнасць кантрабандыстаў “шмат у чым абумоўленая ўмовамі надвор’я, асабліва ветрам”, якія спрыяюць выкарыстанню метэазондаў.

Паводле даных САДМ, з 1 па 15 траўня была перахопленая адна такая партыя, 16 траўня — тры.

Літоўскі бок адзначае, што з пачатку года перахоплена 265 партый цыгарэт, вывезеных з Беларусі на паветраных шарах. У 2023-м іх было 226.

У паведамленні гаворыцца, што з пачатку года затрымана 66 чалавек, якія падазраюцца ў датычнасці да кантрабанды цыгарэт па паветры. У траўні перахоплена 34 паветраныя шары з цыгарэтамі і GPS-прыладамі, у красавіку — 46, у сакавіку — 77, у лютым — 45, у студзені — 63.

Раней паведамлялася, што 15 траўня ў Шальчынінскім раёне Літвы быў перахоплены “супердрон” з грузам кантрабандных цыгарэт з Беларусі. У кардонных скрынках з лагатыпамі гродзенскай тытунёвай фабрыкі “Нёман” знаходзіліся цыгарэты Minsk Superslims з беларускімі акцызнымі маркамі — усяго 3.000 пачкаў.