Карпенка анансаваў змены ў Выбарчы кодэкс у 2027 годзе

15 траўня, Позірк. “Не выключаю, што да чарговага выбарчага цыкла, які пачнецца ўжо ў 2029 годзе, мы можам скарэкціраваць некаторыя нормы выбарчага заканадаўства”, — заявіў старшыня Цэнтрвыбаркама Ігар Карпенка на “рэспубліканскім семінары-нарадзе “Досвед і перспектывы развіцця выбарчай сістэмы Рэспублікі Беларусь” 15 траўня ў Мінску.

Паводле яго слоў, якія перадаюць дзяржСМІ, “ужо ёсць некаторыя прапановы з месцаў, ёсць пэўны аналіз” ЦВК.

Карпенка “ўнёс прапанову аб стварэнні рабочай групы, якая на працягу 2025–2026 гадоў адпрацуе ўсе прапановы і магчымыя змяненні ў Выбарчы кодэкс, каб у 2027 годзе прайсці ўсе працэдуры ўключэння змяненняў і дапаўненняў і прыняцця адпаведнага заканадаўчага акта”.

Пры гэтым ён падкрэсліў, што ЦВК “не з’яўляецца суб’ектам права заканадаўчай ініцыятывы”, але анансаваў свой даклад Аляксандру Лукашэнку аб прапанаваных змяненнях.

Якіх-небудзь падрабязнасьцяў ён не прывёў.

Пад “электаральным цыклам” улады маюць на ўвазе правядзенне працэдур чарговых парламенцкіх і прэзідэнцкіх выбараў у 2029 і 2030 гадах. Папярэднія адбыліся ў 2024 і 2025 гадах (26 студзеня).

З 1996 года ніводная выбарчая кампанія ў Беларусі не была прызнана незалежнымі назіральнікамі транспарэнтнай і адпаведнай дэмакратычным стандартам.

Карпенка, Цэнтрвыбаркам і персанальна шэраг яго сябраў знаходзяцца пад санкцыямі Еўразвяза. Кіраўнік ЦВК — таксама пад абмежаваннямі з боку Вялікабрытаніі і Канады.