У ноч на 9 траўня тэмпература апусцілася ніжэй за 5 градусаў марозу — перапісана 23 рэкорды холаду, у тым ліку 1912 года
9 траўня, Позірк. Трэці год запар у Беларусі ноч на 9 траўня выдаецца вельмі халоднай.
Як і летась, тэмпература апусцілася ніжэй за 5 градусаў марозу, сведчыць праведзены “Позіркам” параўнальны аналіз аператыўных і архіўных звестак Белгідрамета.
Год таму ў Расонах на поўначы Віцебскай вобласці паветра астудзілася да 5,8 градуса ніжэй за нуль, што стала абсалютным антырэкордам ночы за ўвесь перыяд інструментальных метэаназіранняў (з 1881 года).
Мінулай ноччу ў Лынтупах на захадзе Віцебскай вобласці было -5,2. Лакальны антырэкорд пратрымаўся два гады (-2,3).
У Мінску пахаладала да -4,1, перапісаны антырэкорд 1912 года (-3,3). Агулам перакрыта 23 лакальныя мінімумы.