Гендырэктар EPAM Аркадзь Добкін пераходзіць на пасаду старшыні праўлення

8 траўня, Позірк. Аркадзь Добкін 1 верасня 2025 года сыдзе з пасады гендырэктара амерыканскай ІТ-кампаніі з беларускімі каранямі EPAM Systems і зойме пасаду старшыні праўлення, паведамляе прэс-служба EPAM.

Прэзідэнтам і генеральным дырэктарам прызначаны венгр Балаж Фееш, які займаў пасаду прэзідэнта EPAM па глабальным бізнесе і дырэктара па даходах, у кампаніі працуе з 2004 года.

Адзначаецца, што ў якасці выканаўчага старшыні 65-гадовы Добкін “працягне сваю прыхільнасць бачанню кампаніі і будучаму поспеху“, засяродзіўшыся на прасоўванні стратэгічных ініцыятыў і падтрымцы пераемнасці місіі EPAM, працягне актыўна ўдзельнічаць у фармаванні доўгатэрміновага стратэгічнага кірунку EPAM, падтрымліваючы ключавыя адносіны з кліентамі, партнёрамі і інвестарамі, падаючы рэкамендацыі па крытычна важных стратэгічных ініцыятывах і прасоўваючы брэнд кампаніі па ўсім свеце.

“За апошнія тры дзесяцігоддзі EPAM стаў вызначальным праектам майго прафесійнага і асабістага шляху”, — цытуе Добкіна прэс-служба кампаніі. — Мы пачалі з простай веры ў сілу сусветнага таленту і перакананасці ў тым, што праграмнае забеспячэнне можа змяніць свет. Сёння, маючы больш 61.000 спецыялістаў у больш чым 55 краінах, EPAM ўзначальвае намаганні па лічбавай трансфармацыі ва ўсім свеце і распаўсюджвае свой уплыў на адукацыю, устойлівае развіццё і гуманітарныя ініцыятывы. Паспяхова прайшоўшы праз шматлікія хвалі змяненняў і працягваючы інвеставаць у дастаўку і рашэнні на аснове GenAI, я ўпэўнены, што EPAM добра падрыхтавана да вырашэння будучых задач і абапіраецца на наш трывалы падмурак інжынернага дасканаласці і інавацый“.

У прэс-рэлізе адзначаецца, што Добкін узначаліў вяртанне кампаніі да росту, забяспечыўшы магчымасць перавысіць гадавы даход у памеры 5 млрд долараў ЗША.

EPAM Systems — амерыканская IT-кампанія, заснаваная ў 1993 годзе беларускімі прадпрымальнікамі Аркадзем Добкіным і Леанідам Лознерам. Першыя офісы былі адкрыты ў ЗША і Беларусі. У 2021 годзе кампанія заняла 1804-е месца ў спісе Forbes Global 2000 і ўключана ў S&P 500.

Да прэзідэнцкіх выбараў 2020 года EPAM Systems актыўна пашырала свой штат у Беларусі, аднак на фоне палітычных рэпрэсій і ў сувязі з развязанай РФ вайной супраць Украіны супрацоўнікі кампаніі пачалі з’язджаць з краіны. Цяпер яе офісы працуюць у тым ліку ў Літве, Грузіі, Калумбіі.

13 красавіка 2024 года паведамлялася, што EPAM sistemos (зарэгістраванае ў Літве аддзяленне EPAM Systems) завяршыла партнёрства з Еўрапейскім гуманітарным універсітэтам, які базуецца ў Вільнюсе, у рамках праекта EPAM School of Digital Engineering (ESDE). Паводле інфармацыі сайта dev.by, які спецыялізуецца на высокіх тэхналогіях, студэнты даведаліся пра гэта на сустрэчы з адміністрацыяй ЕГУ і дырэктарам літоўскага офіса EPAM. Ім было прапанавана працягнуць навучанне ва ўніверсітэце па спецыяльнасці “Інфарматыка” або перайсці ў іншыя ВНУ.

Прычыны, на падставе якіх прынятае такое рашэнне, не паведамляліся.

Супрацоўнікі ІТ-сектара ў Беларусі цярпелі ад ганенняў і рэпрэсій. Паводле звестак праваабарончага цэнтра “Вясна”, з 2020 года паводле крымінальных артыкулаў асуджана не менш за 79 айцішнікаў, 27 з якіх цяпер у зняволенні, у тым ліку некалькі супрацоўнікаў EPAM.