Да 2029 года плануецца пабудаваць і адрамантаваць больш за 24,5 тыс. км дарог — Турчын

7 траўня, Позірк. Да 2029 года ў Беларусі пабудуюць і адрамантуюць больш за 24,5 тыс. км дарог, на гэта плануецца выдаткаваць каля 13 млрд рублёў, заявіў 7 траўня прэм’ер-міністр Аляксандр Турчын, прадстаўляючы ў Палаце прадстаўнікоў Нацыянальнага сходу праграму дзейнасці ўрада на пяць гадоў.

“Створым хуткасныя дарожныя звучэнні “аграгарадок — райцэнтр — абласны цэнтр”, — цытуе Турчына прэс-служба ўрада. — Напрыклад, час у дарозе ад Мінска да любога горада-спадарожніка будзе займаць да паўгадзіны, ад населеных пунктаў да абласнога цэнтра — гадзіну-паўтара”.

Плануецца таксама пабудаваць і рэканструяваць больш за 650 аб’ектаў інфраструктуры з агульным аб’ёмам фінансавання звыш 20 млрд рублёў (34 бальніцы, 23 дзіцячыя садкі, 27 школ, 22 фізкультурна-аздараўленчыя комплексы).

Акрамя гэтага, урад паставіў задачу забяспечыць насельніцтва даступным арэндным жыллём — пабудаваць каля 5 млн кв. метраў такога жылля. Агульны аб’ём фінансавання складзе 13,5 млрд рублёў.

“Гэтая мера павінна стаць адной з найважнейшых мер па прыцягненні і замацаванні спецыялістаў у рэгіёнах. Прынцып просты: прыйшоў на завод, сельскагаспадарчае прадпрыемства — хутка атрымаеш сваё жыллё. Захаваем таксама дзяржпадтрымку пры будаўніцтве жылля для шматдзетных сем’яў, дзяцей-сірот і іншых уразлівых катэгорый грамадзян. Як вынік, наблізімся да сярэднееўрапейскага ўзроўню забяспечанасці жыллём — 33 кв. метра на аднаго жыхара, — сказаў прэм’ер. — Гэта значыць узровень жыцця нашых грамадзян у рэгіёнах будзе набліжаны да ўзроўню жыцця ў сталіцы. Сістэма стандартаў ужо распрацавана і праходзіць апрабацыю”.

Беларускія ўлады выкарыстоўваюць арэнднае жыллё ў якасці адной з ільгот для сілавікоў. Згодна з профільным указам ад 13 лютага 2023 года № 37, арэнднае жыллё бязвыплатна перадаецца ва ўласнасць пры наяўнасці 25 каляндарных гадоў выслугі на ваеннай службе. Пры 20 гадах выслугі жыллё “перадаецца на платнай аснове, з магчымасцю аплаты яго кошту ў растэрміноўку да 15 гадоў”.

Аб’ёмы будаўніцтва арэнднага жылля “пакуль не дазваляюць цалкам задаволіць наяўныя патрэбы”, заявіла на прэс-канферэнцыі ў Мінску 21 кастрычніка 2024 года намеснік начальніка галоўнага ўпраўлення будаўніцтва і жыллёвай палітыкі Міністэрства архітэктуры і будаўніцтва Іна Пінкоўская.

За апошнія пяць гадоў, паводле слоў чыноўніцы, штогадовы аб’ём будаўніцтва арэнднага жылля вырас у тры разы: у 2019 годзе было пабудавана 113 тыс. кв. м дзяржаўнага арэнднага жылля, у 2023 годзе ўжо было ўведзена ў эксплуатацыю 316 тыс. кв. м.

У студзені — сакавіку 2025 года арганізацыі ўсіх формаў уласнасці пабудавалі 9,3 тыс. новых кватэр — на 13,4% больш, чым за аналагічны перыяд 2024-га (8,2 тыс.), сведчаць даныя Нацыянальнага статыстычнага камітэта.

У эксплуатацыю ўведзена 929,2 тыс. квадратных метраў агульнай плошчы жылля (+18%; 787,5 тыс.).

Для маючых патрэбу ў паляпшэнні ўмоў за гэты час з’явілася 304,9 тыс. кв. м жылля (+17,2%; 260,2 тыс.), у тым ліку з дзяржпадтрымкай — 177,1 тыс. (+1,5%; 174,5 тыс.). Для шматдзетных — 125,4 тыс. (+39,8%; 89,7 тыс.).

Разам з тым плошча ўведзенага ў эксплуатацыю жылля для маючых патрэбу ў паляпшэнні ўмоў за чатыры гады паменшылася ў 2,87 раза, сведчыць праведзены “Позіркам” аналіз даных Нацыянальнага статыстычнага камітэта.

“За мінулыя чатыры гады” ў Беларусі адрамантавана больш за 13 тыс. км аўтамабільных дарог рэспубліканскага і мясцовага значэння, а таксама амаль 400 маставых збудаванняў на іх, заявіў 2 снежня 2024 года ў эфіры тэлеканала СТБ начальнік упраўлення развіцця аўтамабільных дарог галоўнага ўпраўлення аўтамабільных дарог Міністэрства транспарту і камунікацый Леанід Зянкевіч.

Міністр транспарту і камунікацый Аляксей Ляхновіч паведаміў, што ў 2023 годзе ў Беларусі было адрамантавана больш за 3 тыс. км дарог і 107 мастоў, з пачатку 2024-га — звыш 5 тыс. км дарог і 117 мастоў.

Да 2020 года будаўніцтва і рамонт аўтадарог у Беларусі ажыццяўляліся шмат у чым за кошт фінансавання еўрапейскіх фондаў і Сусветнага банка. З 2008 года Беларусь атрымала на рэалізацыю інфраструктурных праектаў (уключаючы рэканструкцыю дарог) каля 5,3 млрд еўра.

Еўрапейскі банк рэканструкцыі і развіцця (ЕБРР) прыпыніў фінансаванне дзяржпраектаў у Беларусі ў 2020 годзе, а ў 2022-м цалкам закрыў доступ Беларусі да сваіх фінансаў на фоне ўнутрыпалітычнага крызісу ў краіне і падтрымкі Мінскам расійскай агрэсіі супраць Украіны.