На мяжы затрыманы беларус, які спрабаваў увезці з Польшчы 3,5 кг наркотыкаў

6 траўня, Позірк. Пры праходжанні кантролю 27 красавіка ў пункце пропуску Брэст (з польскага боку — Цярэспаль) быў затрыманы мужчына, які спрабаваў увезці ў Беларусь “32 скрутка з рэчывам расліннага паходжання”, паведамляе Дзяржаўны пагранічны камітэт (ДПК).

Затрыманы з’яўляецца грамадзянінам Беларусі, ён ехаў у легкавым аўтамабілі з Нідэрландаў, удакладняе ведамства.

З дапамогай экспертызы было ўстаноўлена, што ў скрутках знаходзілася каля 2,5 кг гашышу і 1 кг марыхуаны. Груз быў схаваны ў спінках пярэдніх сядзенняў аўтамабіля, адзначае ДПК.

“Паводле слоў мужчыны, ён планаваў набыць аўтамабіль у Еўропе, але выдаткаваў грошы на наркотыкі”, — гаворыцца ў паведамленні.

У дачыненні да затрыманага распачатая крымінальная справа паводле ч. 2 арт. 328¹ (незаконнае перамяшчэнне праз мытную мяжу Еўразійскага эканамічнага саюза і (або) дзяржаўную мяжу Рэспублікі Беларусь наркатычных сродкаў, псіхатропных рэчываў або іх прэкурсораў ці аналагаў) і ч. 3 арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў) КК. Мужчыну пагражае да 15 гадоў пазбаўлення волі, падкрэслівае ДПК.

23 красавіка Мытны камітэт паведаміў, што 46-гадовы грамадзянін Францыі, які прыбыў у Беларусь рэйсавым аўтобусам з Літвы, схаваў у асабістых рэчах больш за 2,5 г гашышу. Іншаземец быў затрыманы, распачатая крымінальная справа паводле ч. 1 арт. 328¹ КК.

16 красавіка ДПК адрапартаваў пра затрыманне ў пункце пропуску Брэст грамадзянкі Беларусі, якая ехала з Польшчы аўтобусам і спрабавала правезці пакецік з марыхуанай.

2 красавіка паведамлялася пра затрыманне ўначы 31 сакавіка грамадзяніна Латвіі з забароненымі рэчывамі, які ехаў з Літвы ў Беларусь. Паводле інфармацыі ДПК, пры праходжанні кантролю ў пункце пропуску Беняконі (Шальчынінкай) памежнікі выявілі ў мужчыны ёмістасці з курыльнай сумессю, што змяшчае каноплі, а таксама таблеткі з псіхатропным рэчывам, якія затрыманы нібыта планаваў выкарыстоўваць у асабістых мэтах.