У красавіку 31% экспарту яблыкаў з Польшчы за межы ЕС прыпаў на Беларусь

6 траўня, Позірк. У красавіку 2025 года 31% экспарту яблыкаў з Польшчы за межы Еўрасаюза прыпаў на Беларусь, паведамляе польскае выданне Sad24.

Паводле інфармацыі профільнага медыя, на беларускі рынак было пастаўлена 8.841 т яблыкаў. Для параўнання: у сакавіку — 1.500 т.

Адзначаецца, што ў пастаўках польскіх яблыкаў за межы ЕС беларускі напрамак з’яўляецца лідарам. Далей ідуць Казахстан (7.691 т), Егіпет (2.235 т), Індыя (1.354 т), Манголія (1.162 т).

Варта адзначыць, што ў сярэдзіне красавіка ў Беларусі скончыўся трохмесячны тэрмін дзеяння патрабавання, згодна з якім для вывазу шэрагу тавараў, у тым ліку яблыкаў, трэба было атрымліваць ліцэнзію. Такім чынам, з другой паловы мінулага месяца беларускія суб’екты гаспадарання мелі магчымасць свабодна рээкспартаваць польскія яблыкі.

Да 1 траўня на яблыкі і іншую прадукцыю ў Беларусі дзейнічаюць “гранічныя максімальныя цэны”, пасля гэтай даты ў рознічным гандлі будуць “гранічныя надбаўкі”.

Паводле даных Белстата, у першым квартале 2025 года сярод сезонных тавараў у найбольшай ступені падаражэлі менавіта яблыкі (+25,94%).