Ціханоўская на саміце Трохмор’я выступіла супраць ператварэння Беларусі ў ваенны плацдарм РФ
30 красавіка, Позірк. Беларусь павінна быць не ваенным плацдармам Расіі, а часткай стабільнага і бяспечнага рэгіёну, заявіла дэмакратычны лідар Святлана Ціханоўская 29 красавіка ў Каралеўскім замку ў Варшаве, выступаючы на саміце Ініцыятывы трох мораў (Трохмор’я), паведаміла прэс-служба палітыка.
“Я выступаю за тое, каб Беларусь вярнулася ў еўрапейскую прастору — не толькі палітычна, але і эканамічна, лагістычна, энергетычна, — сказала яна. — Ініцыятыва Трымор’я — гэта тая платформа, дзе мы можам будаваць будучыя партнёрствы для свабоднай Беларусі”.
Дэмлідар падкрэсліла, што “ізаляцыя Беларусі, якую праводзіць рэжым” Аляксандра Лукашэнкі, супярэчыць інтарэсам народа і “адрывае краіну ад супрацы” з суседнімі дзяржавамі.
Падчас саміту Ціханоўская, як паведамляецца, правяла “шэраг кароткіх размоў з лідарамі краін — удзельніц” ініцыятывы. У прыватнасці, адбыліся гутаркі з прэзідэнтамі Албаніі, Балгарыі, Польшчы, Славакіі, Чэхіі і Эстоніі, міністрам па еўрапейскіх справах Іспаніі, міністрам транспарта Турцыі, памочнікам сакратара ЗША па энергетыцы.
Прэзідэнт Украіны Уладзімір Зяленскі падчас выступу на саміце сярод іншага заявіў, што Расія “нешта рыхтуе” ў Беларусі сёлета ўлетку, выкарыстоўваючы ў якасці падставы вайсковыя вучэнні. Паводле яго слоў, “менавіта так звычайна пачынаюцца новыя атакі” РФ.
“Але куды на гэты раз? Я не ведаю. Украіна? Літва? Польшча? Не дай бог! Але мы ўсе мусім быць гатовыя. Усе нашы інстытуты адкрыты да супрацы”, — цытуе палітыка агенцтва УНІАН.
Членамі Ініцыятывы трох мораў (Трохмор’е, Балта-Адрыята-Чарнаморская ініцыятыва) — рэгіянальнага форуму шматбаковай супрацы — з’яўляюцца Аўстрыя, Балгарыя, Венгрыя, Грэцыя, Латвія, Літва, Польшча, Румынія, Славакія, Славенія, Харватыя, Чэхія і Эстонія; статус партнёра маюць Албанія, Малдова, Чарнагорыя і Украіна, стратэгічнага партнёра — Іспанія і Турцыя.
Прадстаўніца дэмакратычных сіл Беларусі ўпершыню ўдзельнічала ў саміце гэтай ініцыятывы.