У ДТЗ пад Варшавай пацярпеў грамадзянін Беларусі

29 красавіка, Позірк. У дарожна-транспартных здарэннях 29 красавіка каля Варшавы, паводле ўдакладненых даных, пацярпела 17 чалавек, паведамляе агенцтва “Укрінформ”.

Сярод пацярпелых 13 украінцаў, два палякі, іспанец, а таксама грамадзянін Беларусі.

Паводле слоў прадстаўніка ратавальнай службы Мазавецкага ваяводства “Медытранс” Пятра Аўчарскага, ДТЗ адбыліся каля 4:30 па кіеўскім часе (супадае з мінскім, у Польшчы на гадзіну менш).

“Сярод пацярпелых у аўтобусе — 15 пасажыраў ва ўзросце 17–гадоў. <…> Сярод пацярпелых у другім ДТЗ — 48-гадовы кіроўца грузавіка, грамадзянін Украіны, а таксама польскі выратавальнік”, — адзначыў Аўчарскі.

У пацярпелых, дадаў ён, траўмы галавы, грудной клеткі, рук і ног, яны дастаўленыя ў медустановы Варшавы.

“Двое пацярпелых, у тым ліку кіроўца грузавіка, знаходзяцца ў цяжкім стане, іх жыццю пагражае небяспека”, — сказаў польскі ратавальнік.

Паводле яго ацэнак, на месцы ДТЗ праводзіцца “адна з самых вялікіх выратавальных аперацый у Варшаве за апошні час”, задзейнічана некалькі дзясяткаў ратавальнікаў і паліцэйскіх, вялікая колькасць тэхнікі.

“На месцы быў разгорнуты цэлы ратавальны гарадок. На працягу 20 хвілін усім пацярпелым была аказаная дапамога, некаторыя пацярпелыя, у тым ліку кіроўца грузавіка, былі дэблакаваныя з транспартных сродкаў з дапамогай спецыяльнага абсталявання”, — удакладніў Аўчарскі.

Ён паведаміў, што аўтобус, які трапіў у аварыю, мае польскія рэгістрацыйныя нумары, пры гэтым “на ім былі надпісы на ўкраінскай мове”.

Прычыны ДТЗ высвятляюцца.

Раней паведамлялася пра 16 пацярпелых у ДТЗ, уключаючы адно дзіця. Адзначалася, што 29 красавіка на хуткаснай аўтадарозе недалёка ад міжнароднага аэрапорта імя Шапэна “спачатку аўтобус урэзаўся ў агароджу і перакуліўся на бок”, а затым “грузавік урэзаўся ў машыну Добраахвотнай пажарнай аховы”.

Аўтобус перавозіў 26 чалавек.

Паводле слоў прэс-сакратара Міністэрства ўнутраных спраў і адміністрацыі Польшчы Яцэка Дабжыньскага, у бальніцу дастаўлена 12 чалавек з аўтобуса.

Па якім маршруце рухаўся аўтобус, не ўдакладнялася.

14 лістапада 2024 года паведамлялася аб ДТЗ у Польшчы з удзелам аўтобуса, які рухаўся па маршруце Гомель — Уроцлаў. У аўтобусе ехала 11 чалавек, пацярпела шэсць грамадзян Беларусі, яны былі дастаўленыя ў медыцынскія ўстановы.

24 красавіка ў раёне горада Седльцэ (Мазавецкае ваяводства Польшчы) аўтобус Гданьск — Мінск вылецеў з дарогі ў кювет, дзе перакуліўся на бок і стукнуўся ў дрэва лабавым шклом. У аўтобусе знаходзілася 15 чалавек, сямёра з іх атрымалі траўмы.