Намеснікам кіраўніка Дзяржпагранкамітэта стаў Максім Бутранец — ураджэнец РФ, які знаходзіцца пад санкцыямі, выпускнік акадэміі ФСБ

25 красавіка, Позірк. Намеснікам старшыні Дзяржаўнага пагранічнага камітэта прызначаны Максім Бутранец, які дагэтуль узначальваў Брэсцкую пагранічную групу. Адпаведны ўказ 25 красавіка падпісаў Аляксандр Лукашэнка, паведамляе яго прэс-служба.

Бутранец на гэтай пасадзе зменіць Ігара Печаня, якога Лукашэнка гэтым жа ўказам звольніў у запас на падставе ўзросту “з правам нашэння вайсковай формы адзення і знакаў адрознення”.

Бутранец нарадзіўся ў 1978 годзе ў расійскім Свярдлоўску. У 2001 годзе скончыў Ваенную акадэмію Беларусі. Служыў на афіцэрскіх пасадах на пагранічных заставах Брэсцкай пагрангрупы. У 2008 годзе скончыў акадэмію ФСБ РФ. Быў першым намеснікам начальніка Гомельскай пагрангрупы, начальнікам Пінскага пагранатрада, начальнікам Смаргонскай пагрангрупы, у 2023 годзе быў прызначаны начальнікам Брэсцкай пагрангрупы.

У чэрвені 2021 года, у разгар міграцыйнага крызісу на мяжы Беларусі з краінамі ЕС, Бутранец, які займаў тады пасаду начальніка Смаргонскай пагранічнай групы, заявіў у праграме “Галоўны эфір” на тэлеканале “Беларусь 1”, што колькасць нелегальных мігрантаў на яго ўчастку знаходзіцца на звычайным узроўні. Тады ж у Літве заяўлялі, што плыні нелегальных мігрантаў з Беларусі дасягнулі гістарычнага максімуму.

Бутранец быў уключаны ў пяты санкцыйны спіс Еўрасаюза ў 2021 годзе як начальнік Смаргонскага пагранатрада. Ён таксама фігуруе ў санкцыйных спісах ЗША, Канады, Вялікабрытаніі. Пад абмежавальнымі мерамі заходніх краін таксама знаходзіцца Печань.