24 красавіка, Позірк. Святлана Ціханоўская атрымала запрашэнне ад Святога Пасаду сфармаваць дэлегацыю ад дэмакратычных сілаў Беларусі на пахаванне папы рымскага Францішка ў Ватыкане.
“Ціханоўская даручыла Дзянісу Кучынскаму, дыпламатычнаму дарадцу, узначаліць дэлегацыю і ўзяць удзел у афіцыйных мерапрыемствах з нагоды пахавання папы. Дзяніс Кучынскі — практыкуючы рыма-каталік, на працягу апошніх гадоў адказваў у Офісе Святланы Ціханоўскай за сувязі з Ватыканам”, — паведаміла прэс-служба дэмакратычнага лідара.
Пантыфік памёр 21 красавіка, пахаванне адбудзецца 26 красавіка.
Ціханоўская назвала пантыфікат папы Францішка прыкладам сапраўднага служэння чалавеку.
Ад беларускіх уладаў на пахаванне Францішка паедзе спікер Палаты прадстаўнікоў, былы першы намеснік старшыні КДБ і былы кіраўнік адміністрацыі Аляксандра Лукашэнкі Ігар Сяргеенка.
