Выведвальныя службы Беларусі і РФ спрабуюць арганізаваць напады на беларусаў у Літве — ДДБ

23 красавіка, Позірк. Расійскія і беларускія выведвальныя службы спрабуюць арганізаваць гвалтоўныя напады на беларусаў у Літве, заяўляе Дэпартамент дзяржаўнай бяспекі (ДДБ) гэтай балтыйскай краіны.

Паводле інфармацыі ДДБ, у 2025 годзе “ў сацыяльных сетках пачалі шукаць людзей, якія за грашовую ўзнагароду маглі б напасці на прадстаўнікоў беларускай дыяспары ў Літве”.

Як сцвярджае літоўская спецслужба, арганізатары аперацыі “выдавалі сябе за жыхароў іншай краіны Еўрасаюза нібыта ў пошуку беларусаў, якія навучаюцца ў Вільнюсе, што пагадзіліся б за ўзнагароду зняцца ў музычным відэакліпе”.

“Маладыя беларусы, якія зацікавіліся прапановай аб працы, пагадзіліся прыбыць ва ўмоўленае месца, дзе, згодна з планамі арганізатараў нападу, яны павінны былі быць збітыя, — гаворыцца ў паведамленні. — Адначасова замоўцы задання падтрымлівалі кантакт з патэнцыйнымі яго выканаўцамі, перадавалі ім інфармацыю пра знешнасць беларусаў, узгодненае месца сустрэчы, час, а таксама давалі падрабязныя інструкцыі па здзяйсненні гвалтоўных дзеянняў”.

“Патэнцыйных выканаўцаў таксама падбухторвалі самастойна знаходзіць і нападаць на любога чалавека беларускай нацыянальнасці на свой выбар і фіксаваць гэта злачыннае дзеянне на відэа”, — заяўляе ДДБ.

Канкрэтныя выпадкі нападу на беларусаў, калі такія адбываліся, у паведамленні не пазначаныя.

Літоўская спецслужба адзначыла, што патэнцыйных выканаўцаў падобных заданняў “часцей за ўсё шукаюць сярод рускамоўнага насельніцтва Літвы праз папулярныя каналы ў “Тэлеграме” і іншых групах у сацсетках”. “Таксама выяўленыя выпадкі, калі выканаўцаў нападаў на грамадзян Беларусі спрабавалі знайсці сярод прыхільнікаў праварадыкальных ідэалогій у адпаведных інтэрнет-супольнасцях”, — паведаміў ДДБ.

Ведамства падкрэсліла, што з 2023 года спецслужбы Беларусі і РФ праводзяць на тэрыторыі Літвы “інфармацыйна-псіхалагічную аперацыю, скіраваную на распальванне нацыянальнай варожасці паміж літоўскім грамадствам і новай беларускай дыяспарай”, а таксама на стварэнне ў апошняй “пачуцця небяспекі”. Такім чынам яны імкнуцца “сфармаваць вобраз Літвы як ксенафобскай дзяржавы”.

У рамках гэтай аперацыі, як заяўлена, “здзяйсняюцца ўсё больш небяспечныя правапарушэнні, зафіксаваныя спробы арганізаваць гвалтоўныя напады на прадстаўнікоў беларускай супольнасці ў Літве”. Арганізатары спрабуюць інсцэнаваць супрацьстаянне двух варагуючых бакоў — “беларусаў, якія прасоўваюць ідэалогію літвінізму, і літоўскіх груповак, якія нібыта ім супрацьстаяць”.

ДДБ заклікаў літоўскіх грамадзян “не паддавацца на правакацыі варожых выведвальных структур”, папярэдзіўшы, што выкананне згаданых заданняў “супярэчыць інтарэсам нацыянальнай бяспекі Літвы і можа пацягнуць адміністрацыйную або крымінальную адказнасць”.

У 2024 годзе ў Вільнюсе адбылося некалькі атак на беларускія арганізацыі.

Напад на Цэнтр беларускай супольнасці і культуры ў Вільнюсе адбыўся 26 кастрычніка — супрацоўнікі цэнтра знайшлі сляды агню на ўваходных дзвярах у будынак, дзе апрача гэтай арганізацыі месціцца Беларускі музей імя Івана Луцкевіча.

На сцяне будынка нехта таксама пакінуў надпіс “Dink iš Lietuvos” (“Вымятайцеся з Літвы”), а таксама сапсаваў мурал з “дыджэямі перамен” (малюнак Кірыла Галанава і Улада Сакалоўскага, якія ўключылі кампазіцыю “Перамен” Віктара Цоя 6 жніўня 2020 года ў Кіеўскім скверы Мінска на “дзіцячым свяце”, якое ўлады зладзілі, каб не даць магчымасці сабрацца праціўнікам Аляксандра Лукашэнкі).

У ноч на 4 верасня невядомыя разбілі шкло Цэнтра беларускай супольнасці і культуры. Тады ж нехта абстраляў з пнеўматычнай зброі памяшканне, дзе праводзіць службы беларускі прыход Канстанцінопальскага патрыярхата ў Вільнюсе, у акне засталася адтуліна.

У ноч на 28 ліпеня на будынку беларускай крамы сувеніраў “Кропка” ў Вільнюсе невядомыя пакінулі надпіс на літоўскай мове “Вяртайцеся дадому, беларускія свінні” і разбілі акно.

Дэмакратычныя сілы Беларусі лічаць гэтыя інцыдэнты правакацыяй з боку рэжыму Лукашэнкі.