Прэзідэнт Польшчы назваў класічнай дэзінфармацыяй пагрозы кіраўніка СЗВ Расіі, якія прагучалі ў Мінску
15 красавіка, Позірк. Прыкладам “класічнай расійскай дэзінфармацыі, тыповай для савецкай школы прапаганды” назваў прэзідэнт Польшчы Анджэй Дуда пагрозы, якія прагучалі ад кіраўніка Службы знешняй выведкі Расіі Сяргея Нарышкіна 15 красавіка ў Мінску.
Нарышкін, у прыватнасці, заявіў, што ў выпадку магчымай агрэсіі НАТО супраць Беларусі і Расіі першымі пацерпяць Польшча і краіны Балтыі: “Яны (краіны НАТО. — “Позірк”.) павінны б зразумець, але пакуль не разумеюць, што ў выпадку агрэсіі з боку Паўночнаатлантычнага альянсу супраць Саюзнай дзяржавы ўрон будзе нанесены, безумоўна, усяму блоку НАТО, але ў большай ступені першымі, хто пацерпіць, будуць носьбіты такіх ідэй сярод палітычных колаў Польшчы і прыбалтыйскіх краін”, — заявіў Нарышкін.
Паводле яго сцвярджэння, Польшча і краіны Балтыі “адрозніваюцца высокай агрэсіўнасцю, прынамсі на словах, увесь час грукаюць зброяй”.
Гэтыя пагрозы, паводле інфармацыі польскага агенцтва ПАП, Дуда пракаментаваў на прэс-канферэнцыі ў Заграбе пасля сустрэчы з прэзідэнтам Харватыі Зоранам Міланавічам.
“Гэта кажа Расія, якая перакідвае сваю ядзерную зброю ў Беларусь, нахабна набліжаючы яе да меж НАТО і Еўрасаюза. Расія, якая паводзіць сябе агрэсіўна ў адносінах да НАТО і рэалізуе свой жорсткі і крывавы імперыялізм, нападаючы на Украіну ўжо трэці год”, — сказаў Дуда.
Ён падкрэсліў, што НАТО — выключна абарончы альянс. “Усё, што робіць НАТО, — гэта адказ на расійскую агрэсію. <…> НАТО ніколі ні на каго не нападала і не нападае; гэта альянс, які толькі забяспечвае бяспеку”, — заявіў прэзідэнт Польшчы.
Дуда заклікаў да спакою і разважлівасці, працягнення цяперашняга палітычнага курсу, заснаванага на ўмацаванні бяспекі і стабільнасці. “Умацаванне еўраатлантычных сувязей, мадэрнізацыя нашых армій, каб патэнцыял стрымлівання быў рэальным у нашых краінах — <…> гэта адзіная эфектыўная палітыка, якую трэба працягваць рэалізоўваць спакойна і паслядоўна”, — сказаў ён.
У Мінску Нарышкін выдаў абарончыя крокі Варшавы за наступальныя: “Польшча дайшла да таго, што заяўляе пра свае планы ўсталяваць уздоўж меж з Беларуссю і Калінінградскай вобласцю РФ каля 2 млн супрацьтанкавых мін і вельмі хацела б, разлічвае і спадзяецца атрымаць яшчэ і амерыканскую ядзерную зброю”. Як размяшчэнне супрацьтанкавых мін, прызначаных для абароны, дэманструе “агрэсіўнасць”, ён не растлумачыў.
“Яны ніяк не могуць зразумець, што менавіта нарошчванне ваеннай актыўнасці каля меж Расіі і Беларусі стала адным з фактараў, адной з прычын цяперашняга вялікага, вострага і вельмі небяспечнага крызісу на Еўрапейскім кантыненце”, — заявіў прадстаўнік выведкі краіны, якая ў 2022 годзе пачала поўнамаштабную агрэсію супраць Украіны, што стала найбуйнейшым канфліктам у Еўропе з часоў Другой сусветнай вайны.
Нарышкін паведаміў таксама, што на сустрэчы з Аляксандрам Лукашэнкам абмяркоўваў “шэраг пытанняў, што тычацца рэгіянальнай, глабальнай бяспекі”.
“Аляксандр Рыгоравіч падтрымаў і заўсёды падтрымлівае сумесную дзейнасць спецслужбаў нашых дзвюх дзяржаў па забеспячэнні інтарэсаў, забеспячэнні бяспекі нашых дзяржаў, Саюзнай дзяржавы Расіі і Беларусі, забеспячэнні бяспекі грамадзян нашых дзвюх краін”, — адзначыў кіраўнік СЗВ.
15 жніўня 2024 года ў інтэрв’ю тэлеканалу “Расія” Лукашэнка прыгразіў Захаду “калі трэба” ператварыць абарончыя планы ў наступальныя. 8 красавіка 2025 года ў інтэрв’ю тэлевізійнай кампаніі СНД “Мір” ён заявіў пра дамоўленасць з прэзідэнтам РФ Уладзімірам Пуціным “глядзець наперад” і “бачыць іншыя напрамкі і магчымыя тэатры ваенных дзеянняў“.