Лукашэнка ўвязаў праблему даўгабудаў у “Мінск-Свеце” з далейшай працай у Беларусі кампаніі братоў Карычаў
14 красавіка, Позірк. У Мінску 13 даўгабудаў, з іх 8 — у комплексе “Мінск-Мір”, іх наяўнасць недапушчальная, заявіў Аляксандр Лукашэнка 14 красавіка, прымаючы з дакладам старшыню Мінгарвыканкама Уладзіміра Кухарава.
“Яны (кампанія-забудоўшчык. — “Позірк”.) прыйшлі сюды працаваць, заключылі з намі інвестыцыйныя пагадненні, дагаворы, узялі на сябе абавязацельствы. Няхай выконваюць, калі хочуць працаваць тут”, — цытуе спікера яго прэс-служба.
Лукашэнка, мяркуючы з паведамлення на яго сайце, не назваў забудоўшчыка, аднак вядома, што праектам “Мінск-Свету” займаецца кампанія “Дана Астра” (Dana Astra, падраздзяленне Dana Holdings) сербскіх бізнесменаў — братоў Багалюба і Драгаміра Карычаў.
Спікер таксама нагадаў пра планы будаваць жыллё пераважна па-за межамі Мінска, “каб не збіраць людзей сюды, не ствараць праблемы для мінчан”.
Заслухоўваючы 29 снежня 2023 года даклад Кухарава наконт будаўніцтва жылля ў сталіцы, Лукашэнка звярнуў увагу на скаргі на адрас “Дана Астра” і даручыў “разабрацца, чаму людзі крыўдзяцца”.
“Няхай перарабляюць усе. Бо адкажуць так, як адказваюць усе ў Беларусі. Прыйшлі працаваць у Беларусь — няхай працуюць, як трэба. Трэба пільна паглядзець за гэтымі будаўнікамі”, — сказаў ён.
16 лістапада 2024 года паведамлялася пра затрыманне дырэктара кампаніі “Дана Астра” Святланы Шчатко і яе намесніка Паўла Аўчарова. Затрымлівалі таксама іншых менеджараў кампаніі — Мілана Ракочавіча, Ненада Сімонавіча, Вібора Муліча. Пазней Ракочавіча і Муліча вызвалілі.
Затрыманні маглі быць звязаныя з вынікамі праверкі, праведзенай у кампаніі Камітэтам дзяржкантролю.
Багалюб Карыч у 2022 годзе трапіў у санкцыйны спіс Еўрасаюза.
19 сакавіка 2025 года Еўрапейскі суд у Люксембургу адмовіўся здымаць санкцыі з “Дана Астра”. Згодна з рашэннем суда, кампанія застанецца ў санкцыйным спісе як суб’ект, што падтрымлівае рэжым Лукашэнкі і атрымлівае ад яго выгоды.
У абгрунтаванні, у прыватнасці, сказана, што ўладальнікі кампаніі “падтрымліваюць шчыльныя стасункі з Аляксандрам Лукашэнкам”, а “Лілія Лукашэнка, нявестка прэзідэнта, займае ў кампаніі высокую пасаду”.