13 красавіка, Позірк. У апошні час прадстаўнікі беларускіх службаў “звяртаюцца да прамых правакацый і агрэсіўных дзеянняў паблізу мяжы”, напісаў у X міністр унутраных спраў і адміністрацыі, каардынатар спецыяльных службаў Томаш Семаняк.
Паводле яго, у ахове рубяжоў задзейнічана 11 тыс. чалавек.
Каментар міністра з’явіўся праз некалькі гадзін пасля таго, як прэс-сакратар ведамства Яцэк Дабжыньскі ў той жа сацсетцы паведаміў пра чарговую спробу нелегальнага пранікнення ў краіну: “Мяжа каля Мельніка. Некалькі дзясяткаў чалавек спрабуюць абысці ахову і нелегальна пранікнуць у Польшчу. Калі з’яўляецца патруль памежнай аховы, тыя, хто нападаў пачынаюць кідаць камяні ў надыходзячую машыну. У групе агрэсараў камера фіксуе чалавека ў форме”.
Ён таксама апублікаваў два кароткія відэа інцыдэнту.
З пачатку года, паводле падлікаў “Позірку”, Польшча спыніла больш за 4,6 тыс. спробаў незаконнага перасячэння мяжы з беларускай тэрыторыі, з пачатку красавіка — больш за 1,1 тыс. Дэталёвы аналіз абцяжараны ў сувязі з тым, што Памежная ахова Польшчы ў апошнія месяцы публікуе прыблізныя лічбы, якія разыходзяцца з дадзенымі іншых краін Еўрасаюза, суседніх з Беларуссю.
За 2024 год Літва, Латвія і Польшча прадухілілі 36,3 тыс. спробаў незаконнага пранікнення мігрантаў з беларускай тэрыторыі
Міграцыйны крызіс на граніцы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
13 чэрвеня 2024 года на польска-беларускай мяжы пачала дзейнічаць буферная зона, яе дзеянне неаднаразова працягвалася — улады Польшчы палічылі яе дзейснай.
27 сакавіка паведамлялася, што ўрад Польшчы абмежаваў права мігрантаў прасіць аб даванні міжнароднай абароны на мяжы з Беларуссю.
