Беларускіх зенітчыкаў вучылі процідзейнічаць комплексам РЭБ і пошуку “незаконных узброеных фарміраванняў“

11 красавіка, Позірк. Аб правядзенні тактычных вучэнняў у 115-м зенітным ракетным палку паведаміла прэс-служба Міністэрства абароны.

Манеўры адбываліся на 210-м авіяцыйным палігоне (палігон “Ружаны“ знаходзіцца на тэрыторыі трох раёнаў Брэсцкай вобласці: Бярозаўскага, Івацэвіцкага і Пружанскага).

Адзначаецца, што пасля маршу асабісты склад разгарнуў тэхніку і ахову. Праца зенітчыкаў вялася ва ўмовах “процідзеяння комплексам радыёэлектроннай барацьбы”, падкрэсліла Мінабароны.

“Дывізіён адпрацаваў абарону калоны ад ДРГ (дыверсійна-разведвальные групы. — “Позірк”.), пошук незаконных узброеных фарміраванняў, размініраванне ўчастка мясцовасці, — гаворыцца ў паведамленні. — Разлікі зенітных установак адбілі напад беспілотнікаў, а вайскоўцы аддзялення захоўвання, перагрузкі і транспарціроўкі здзейснілі перагрузку ракет зенітнага ракетнага комплексу С-300“.

Таксама ваеннае ведамства паведаміла, што байцы 38-й Брэсцкай асобнай гвардзейскай дэсантна-штурмавой брыгады на занятках па ваджэнні баявых машын на плаву “пераадольвалі водную перашкоду ва ўмовах уздзеяння дыверсійных сіл умоўнага праціўніка“.

Акрамя таго, дэсантнікі “адпрацоўвалі тактычныя задачы на розных участках мясцовасці і ажыццяўлялі знішчэнне ўмоўнага праціўніка з розных відаў узбраенняў“.

Трэці месяц запар улады правяраюць баявую гатоўнасць арміі. Першая праверка боегатоўнасці была абвешчаная 3 лютага. Фактычна без выразнага завяршэння першай пачалася другая — 24 сакавіка.

Рэжым Аляксандра Лукашэнкі практычна безупынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой ён адкрыта падтрымлівае Крэмль.

Увосень 2025 года на беларускай тэрыторыі пройдуць сумесныя з Расіяй стратэгічныя вучэнні “Захад“.