Нігерыйскія вайскоўцы азнаямляюцца з сіламі спецаперацый Беларусі
10 красавіка, Позірк. Вайсковая дэлегацыя Нігерыі на чале з кіраўніком цэнтра баявой падрыхтоўкі сухапутных войскаў Усманам Юсуфам наведвае Беларусь з 9 красавіка, вынікае з паведамлення памочніка міністра абароны па пытаннях міжнароднай вайсковай супрацы (МВС), начальніка дэпартамента МВС Валерыя Равенкі.
“Прадстаўнікі найбуйнейшай краіны Заходняй Афрыкі азнаёмяцца з вучэбнай матэрыяльнай базай ССА УС РБ (сіл спецыяльных аперацый Узброеных сіл Рэспублікі Беларусь. — “Позірк”.) і асаблівасцямі баявой падрыхтоўкі гэтага роду войскаў”, — напісаў ён на сваёй старонцы ў сацыяльнай сетцы Х.
Беларусь і Нігерыя ўсталявалі дыпламатычныя стасункі 3 жніўня 1992 года. Беларуская амбасада ў Абуджы адкрылася ў снежні 2011-га.
Згодна з “Індэксам вайсковай моцы — 2025”, які вылічыла амерыканская кампанія Global Firepower, Нігерыя апярэджвае Беларусь у колькасці жывой сілы (у краіне пражывае больш за 230 млн чалавек), паветраных і марскіх сіл; паводле абароннага бюджэту, рэсурсаў і лагістыцы, але саступае ў плане сухапутных войскаў і геаграфічных асаблівасцей.
